Ni thum awh Leitlangpui Music Festival 2025 zawh fel a ni

Hnahthial Post | November 16, 2025, Lunglei: November ni 13-15, 2025 chhunga Kawmzawl (Pukpui, Lunglei)-a Rimawi Kutpui huaihawt, Leitlangpui Music Festival (LMF) 2025 chu hlawhtling taka hman niin, zanin khan a hmawr bawk fel a ni.

Leitlangpui Music Festival 2025 tawp zanah hian Tourism Minister Pu Lalnghinglova Hmar chuan Leitlangpui a chul dawn lo tih mai an duh tawk loh thu leh Leitlangpui a vul zel dawn tih an duh thu sawiin, nikum lamah hlawhtling taka Leitlangpui Music Festival bul ṭan a nih hnuah, kuminah a aia ropui zawka buatsaih niin, nakkumah ropui lehzualin buatsaih zel tum a ni, a ti a. Lunglei chu Mizoram rimawia sul sutu, Serkawn Concert lo chhuahna a nih angin Leitlangpui Music Festival pawh a par vul zel dawn a ni, a ti.

Tourism Minister Pu Lalnghinglova Hmar chuan Mizo leh Mizo kan inlawm a, Mizo hla saa kan zai ṭhup ṭhup te, kan hla, kan zaithiam leh rimawi tum thiamte kan ngaisang te hi rimawi kutpui tihlawhtlingtu a ni tiin, Mizoram Tourism-in ṭhang zel tura a mamawh a nih thu a sawi a. Mizoram hmun tina mite chu intlawh tawn sup sup a, hunpui leh hun bil (event) buatsaih a, chumi kal tlang chuan tualchhung mite ipteah sum a luh a, ram eibar dinhmun (economy) chawi kan a nih chu Tourism-in a tum a nih thu sawiin, event ṭha, khualzin hip thei buatsaih zel tum a nih thu a sawi.

Tourism Minister chuan Leitlangpui Music Festival chu a ṭiak dawn a, tourism erawh a ṭiak dawn lo tiin, Aizawlah December ni 15-23 chhungin Winter Festival buatsaih tum a nih thu te, Krismas lam hawia hun duan a, Krismas carol leh Krismas costume parade te buatsaih tum a nih thu te a sawi a. December ni 31-ah a huhovin Mizo ṭhalaite tan Sakawrhmuituai Sunset programme buatsaih a, kum hlui ni tla thlir liam tum a nih thu a sawi a. Mizoramah kum hlui thlaha tourist hip thei turin ruahmanna siam a ni tiin, Mizorama khualzin tam zawk hip luh an nih theih nan Mizo thil ngaisang a, lawm a, chawi lar zel turin ṭhalaite a chah.

Leitlangpui Music Festival 2025 tawp zanah hian Lunglei High Powered Committee (HPC) Vice Chairman Pu V. Malsawmtluanga leh Lunglei West bialtu MLA Pu T. Lalhlimpuia te pawh an tel a. Leitlangpui Music Festival hlawhtling tak leh hlung taka buatsaih a ni chu lawmawm an tih thu an sawi.

Leitlangpui Music Festival 2025 tawp ni-ah hian chhun lamah stall hrang hrangte mipui tlawh theih leh dawr theiha hawn a nih bakah, Janjatiya Gaurav Diwas 2025 pualin Lunglei Bawrhsap Pisa chuan hriselna endikna (health screening) an buatsaih a. Tlai dar 4 aṭangin rimawi ruai ṭheh niin, Vuantea, Rosalind & Olaftea, Feli Band, Deborah Ralte, Cassettes, Ruatpuii, Saka, Bzi Tochhawng, Mimi Renthlei, Lalsangliana (Taitea), Trance Effect, Albatross leh Lilac & Jacks te'n zai leh rimawiin Kut chhimtute an awi a ni.

LMF 2025 hi Tourism Ministry aṭanga sum hmuh cheng nuai 25 leh Mizoram sawrkar aṭanga sum hmuh cheng nuai 25, a zavaiin cheng nuai 50 bakah, sumdawng leh agency hrang hrang aṭanga ṭanpuina (sponsor) sum hmuh hmanga buatsaih a ni a. Event management agency (EMA) atana tender hmanga thlan, Brighter Co. leh BBY Animals te'n Kut huaihawt hi buaipuiin, zaithiam hrang hrangte nen Rimawi Kutpui hun hman a nih bakah, Kut chhimtute tan ei leh in, hnam thuam, kut themthiam thil leh bungraw chi hrang hrang zawrhna stall te, intihhlimna hmun leh dan lam inzirtirna hmun te ruahman a ni a, stall hrang hrang 100 vel hawn a ni a. Kut hi mipuiin an hlutin, chhimtu pawh an ṭhahnem thei hle a ni.