RD&AD Minister hovin RD&AD hnuaia Scheme hrang hrang hmalakna thlirletna nei

Hnahthial Post | November 6, 2025, Aizawl: Vawiin khan Prof. Lalnilawma, Minister, Rural Development & Administration Department (RD&AD) chuan RD&AD hnuaia scheme hrang hrang hmalaknate thlirletna chu Aijal Club-ah khuallian niin a hmanpui a. He hun hi Pu R. Zarzosanga, Commissioner & Secretary, RD&AD chuan a kaihruai a ni.

Minister Prof. Lalnilawma chuan RD&AD hnuaia peng hrang hrangte chu an thawkho tha a tih thu leh RD&AD chu thingtlang mite innghahna ber leh khawtlang tih hmasawnna tur thil tangkai hrang hrang siamtu a nih avangin chak taka hnathawh zel a pawimawh thu a sawi a. Field level-a thawktute pawhin an hna dik taka an thawh a pawimawh, a ti a. District level-ah pawh review meeting neih thin nise, hnathawh endik leh hmalak dan hrang hrang inzir tawn nan tha a tih thu a sawi a.

Minister chuan MGNREGA hnuaia thawktuten hlawh a huna an la lo chu pawi a tih thu sawiin, sum awm reng mah se technical problem vangin an hlawh pek chhuah a la nih theih loh thu a tarlang a. Hlawh an lak vat theih nan hma an lak mek thu a sawi bawk a. The Mizoram (Village Councils) Act, 2025 chuan thingtlang khaw hrang hrangte tih hmasawnna kawnga hma latu tur Village Development Committee din ni se a tih angin Committee din a nih tur thu leh hmasawnna nasa tak a thlen a beisei thu a sawi a ni.

Vawiin thutkhawmah hian RD&AD Secretariat, RD Directorate, SIRD&PR, MzSRLM, LA Directorate leh Social Audit atangtein presentation thlirho a ni a. Hna thawh tawhte endik niin, tha zawka hmalak dan tur leh thawhho zel dan turte sawiho a ni.

Tun dinhmunah hian MGNREGA hnuaiah Job Card 2,12,043 pek chhuah tawh niin Active Job Card 2,10,574 (99.30%) a awm a. Workers 2,37,079 awmin Active Workers 2,10,900 (88.95%) an awm a. Active Job Card leh Active Workers awm zatah Mizoram chu a ti tha pawl a ni a. FY 2025-26 atan tun thleng hian person days 51.59% zawh tawh a ni a. Ni 8 chhunga hlawh pek chhuah zat 92.42% niin, hetah pawh hian Mizoram chu a ti tha pawl a ni a. Aadhaar based payment system (ABPS) pawh tha taka kalpui niin, district 3 – Hnahthial, Khawzawl leh Lawngtlai-ahte 100% a kalpui a ni. Vawiin hunah hian district hrang hranga Project Director-te, BDO-te leh officials dangte an tel a ni.