Hnahthial Post | November 10, 2025, Aizawl: Vawiin khan Chief Minister Pu Lalduhoma chuan College of Veterinary Sciences & Animal Husbandry, Central Agriculture University (Imphal), Selesih din cham kum 27 na lawmna a hmanpui a. He college campus chhunga sak thei leh thlai thianghlim dan endikna Pesticide Residue Analysis Laboratory a hawng nghal.
Pu C. Lalsawivunga, Horticulture Minister leh Pu PC Vanlalruata, Agriculture Minister te chu khualzahawm an ni.
Thusawiin Chief Minister chuan, Selesih Vety College chu Mizoram mai ni lovin, India hmarchhak state dangte tana zirna in tangkai a ni a. Tluang taka kum 27 zet a kal ta hi a lawmawm hle a ni. Kan hriat angin Mizoram mipui tam ber hi Agriculture kaihhnawiha eizawng kan ni a, ran vulh phei chu kan uar em em a. Ranvulh leh enkawl lama thiamna nei kan mamawhna a sang a, mipuite hnena zirtirna uar taka kalpui a ngai bawk a. Chung thil pahnih kan mamawh em em te min thawhsaktu tangkai tak chu he College hi a ni. Mipuite eizawnna leh he College hi a inzawm tlat avangin mipuite pawhin he College leh Thenzawl Horticulture College hi kan ngaihven a ni, a ti. Zirtirtu leh thawktute inpekna fakin, zirlai naupangte pawh taima taka an zirlaite zir tlat turin a fuih a ni.
Chief Minister hian, Pesticide Residue Analysis Laboratory chu All India Networks Project on Pesticide Residue hnathawh nan chauh ni lovin kan loneitute tan leh kan thlai lakluhte endikna atan a tangkai thei dawn a. Vantlang hriselna tha tawk kan neih theihna atana hmanraw pawimawh a ni. Zirlai leh zirbingna neite tan a tangkai hle bawk ang. Mizoram tan hmasawnna chhinchhiahtlak a ni, a ti.
Foundation day lawmna hi College Auditorium-ah buatsaih a ni a. Dr. Lalnuntluangi Hmar, Dean chuan kalkhawmte lawmna thu a sawi a, khualzahawm Pu C. Lalsawivunga leh Pu PC Vanlalruata te, Dr. Anupam Mishra, Vice Chancellor, Central Agriculture University, Imphal te, Dr. Vandana Tripathy, Network Coordination, All India Networks Project on Pesticide Residue ten thu an sawi bawk.
He college ah hian zirlai naupang 440 an awm mek a, kum 1997 a bul an tan atanga chhiarin tun thlengin BVSc & AH Graduate naupang 891, Post Graduate 378 leh Ph.D 15 an zirchhuak tawh a ni.
Sorkar laipui chuan thlai hrisel leh thianghlim thar a tulzia hriain kum 1985 kha All India Network Project on Pesticide Residue a din a, anni hian ram pumah centre 19 an nei thin a. Kum 2010 khan hmar chhak biala a awm chhun ni turin Selesih Vety College pawh hi centre pakhatah a pawm a. Kum 2019 khan hmanraw changtlung leh centre puitling tak a nih theih nan College hian Mizoram sorkarah RKVY Scheme kaltlangin Rs.1180 lakh man project a thehlut a, sorkar hian lo pawnsakin hmalak zui nghal a ni a. Vawiinah hawn a lo ni ta a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News