Fisheries Department Minister, Pu Lalthansanga'n Tuipui South Fish Festival 2025 hawng

Hnahthial Post | December 17, 2025, Tuipui South: Fisheries Department leh Tuipui South khawtlang hruaitute tangkawpin a an buatsaih, Fish Festival, 2025 chu vawiin khan Fisheries Department Minister, Pu Lalthansanga chuan a hmunah a hawng a. Bialtu MLA, Pu Jeje Lalpekhlua chuan thu sawina hun hmangin a ni bakah hian Dy. Speaker, Pu Lalfamkima, MLA Dr. Lorrain Lalpekliana Chinzah, MLA Pu T. Lalhlimpuia leh Sawrkar officials hrang hrang ten Minister hi an tawiawm a ni.

Minister chuan Tuipui South Fish Festival chu hawngin kum tam tak chhung tha tak maia sangha an lo humhalh tawh, hetia awmze nei taka man theihna hun an buatsaih chu lawmawm a tih thu a sawi a. A hlawhtlin nana hun leh tha sengtu khawtlang mipuite bakah Department lama thahnem ngai taka thawktute chungah lawmthu sawiin Fisheries Department kal dan phung pawh tihdanglam chhoh zel an tum thu a sawi a. Central Scheme, PMMSY chu party mi leh sa te duhsak nan a hmang lovin a ti tak tak duhte hnenah chauh pek thin a nih tawh tur thu sawiin PMMSY chang ni lovin scheme hrang hrang, Bana Kaih Scheme ngeiah pawh hian tum tak tak, ti tak tak te hnenah chauh hamthatna hi pek thin a nih tawh thu a sawi bawk.

Mizoram chu tun dinhmunah India rama state Corrupt lo ber pahnihna an nih mek thu sawiin Zoram chu takna ramah an kaihhruai mek thu a sawi a. Chutih rual chuan mipuite beiseina zawng zawng tih hlawhtlin a har thu sawiin social media kan hman kawngah mipuite chu thudik ziktluak lo chu thehdarh lo hram turin a ngen nghal a ni.

Bialtu MLA Pu Jeje Lalpekhlua chuan Fish Festival buatsaih a ni thei ta chu Department leh khawtlang mipuite tanrualna leh hmalakna zar a nih thu a sawi a. Social media-a kut leh festival hrang hrang chu sawiselna awm thin mah se khaw mipuiten an chhawr a, hlawkna an neih phahna a nih chuan chu chu an ngaih pawimawh ber a nih thu a sawi a. Tun hnaia Hnahsin kut neih takah khan khaw chhungah cheng nuai 1500 chuang sum leng vak a awm thu tarlangin chu chuan heng Kut leh Festival kan tih te pawimawhna a tarlan thu a sawi. Mikhual ten an tlawh tamna hmun hi mipuite sawi tam leh hmun langsar a ni thin thu sawiin tuna Fish Festival leh kut hrang hrang kan neih te hi kan ram theihna leh ropuina ti langchhuaktu an nih zel a beisei thu a sawi a ni.

Fish Festival hawnna programme hi Fisheries Department Secretary, Er. Lalrothanga'n a kaihruai a. He Festival hi December ni 17 atanga ni 19 thleng hian neih tura ruahmanna siam niin ni khatah hian Chawhma leh Chawhnu ah chiahna hun hi siam a ni a. A ni khatna leh ni hnihna ah hian ticket man hi Rs. 3000 niin a ni thumna chawhmaah ticket hi Rs. 2000 man niin chawhnuah Rs. 500 man a ni thung ang.

Sangha hi nghakuai hmang chauhva man phal niin hriat theih chinah a ni khatna chawhma a sangha man len ber chu Pharawng Phuhang sangha niin 14 kg a rit a ni.