Hnahthial District Sawrkar Hnathawkte tan Dan leh Hrai chungchang inhrilhhriatna leh intuaitharna hun hmang

Hnahthial Post | December 11, 2025, Hnahthial: Vawiin khan Hnahthial DC Conference Hall-ah Administrative Training Institute (ATI) leh Mizoram State Legal Services Authority (MSLSA) tangkawp chuan Hnahthial District chhunga sawrkar hnathawkte tan Dan leh Hrai hriattur pawimawh inhrilhhriatna hun - Special Awareness Campaign on Legal Provisions and Matter for Government Officials within Hnahthial District chu an buatsaih a. Pi Esther Leihang, SDO(Sadar) chuan keynote address neiin dan lama thiamna bik nei ten dan hrang hrang inhrilhhriatna leh inzirtirna hun an hmang a ni.

SDO (Sadar), Pi Esther Leihang chuan tunlaiah chuan social media hmang kan tam tawhin phone hmanga thil tih leh sawi mai hi a awl tawh a, chuvang chuan dan in min phuar ve ta lo amaw tih hi a awl tawh thu a sawi a. Sawrkar hnathawkte phei chu mipuiten an rawn ber te kan nih thin avangin dan chungchang hi kan hriat bel a tul hle a ni tiin khawi hmunah pawh kan thu ziah leh sawi te hi fimkhur a tul thu a sawi. Zirna leh thiamna sang tak pawh nei mah ila kan hriattur awm ang kan hriat loh chuan mi rin kan hlawh thei loh thu sawiin sawrkar hnathawkte chu mipuite leh sawrkar inthlunzawmna kan nih avangin eng kawngah pawh rawn a belh tlak kan nih theih nan dan leh hrai kan hriat chian hi a tul hle a ni a ti bawk.

Hun kaihruaitu, Pu Lalbiakenga, Deputy Director (Trg), ATI chuan he campaign buatsaih a nih chhan sawifiahin mipui rawngbawltu sawrkar hnathawkten, thuthlukna felhlel, hnathawh belhchian dawl lo, sawrkar leh mipuite tana buaina tam tak thlen thei an siam loh nan a nih thu tarlangin dan hriatna kawngah sawrkar hnathawkte an intuai hnum thar leh nan a nih thu a sawi a. He campaign hi mipuite rawngbawlna leh mahni tihtur theuhte felfai taka hlen chhuahna kawnga puitu a nih ngei a beisei thu a sawi bawk.

He campaign hi Mizoram District Headquarters tinah tun Financial Year chhunga neih kim hman tum a ni a. Sawrkar hnathawkte thinlungah dan zawm zel duhna tuh a, an nunphunga behtir tlat tura inzirtir chu a thil tum niin dan leh kawng hmang hriat loh avanga sawrkar sum leh tha sen ral thin ven nan a buatsaih a ni.

He Campaign-ah hian dan leh hrai hrang hrang chungchang inzirtirna hun, tarlan ang hian neih a ni:

1. General Principles/Legal Maxims/Doctrines in Law - Pu Lalramsanga, Chief Judicial Magistrate

2. Child Laws : POCSO & JJ Acts - Pu ZD Lalnunsanga, Advocate

3. Writ Petitions including Appeals, Contempt cases and Parawise comments - Mr. Malsawmdawngliana, PP-Cum-Govt. Advocate

4. Social Media Ethics leh Alternate Dispute Redressal/Legal services - Pi Lalthansiami Hnamte, Sr. Civil Judge & Secretary, Lunglei DLSA

He programme hi Pu R. Vanlalruata, SDC chuan lawmthu sawiin a khar a ni.