UD&PA Minister-in Multipurpose Community Centre leh Aizawl Dawh-Rem te a hawng

Hnahthial Post | December 9, 2025, Aizawl: Vawiin khan UD&PA Minister Pu K. Sapdanga’n Urban Development & Poverty Alleviation Department hmalaknaa din cheng nuai 500 hu ‘Multi-purpose Community Centre’, Zonuam Veng ami leh nuai 145 senga sak Aizawl khawpuia mipui veivakte tana chawlh hahdamna tur, ‘Aizawl Dawh-Rem’, Zodin Square, Vanapa Hall bula mite a hawng.

Multi-purpose Community Centre (MCC) hawnna inkhawm hi MCC Conference Hall, Zonuam vengah buatsaih niin Pu Lalmalsawma Pachuaua, UD&PA Secretary -in a kaihruai a, UD&PA department hotute bakah, Education Deptt., AMC, Smart City Ltd., YMA leh khawtlang hruaitu mi thahnem tak an tel a ni.

Minister Pu K. Sapdanga chuan thu sawiin Multipurpose Community Centre din a nih theih nana ram petu School Education Department leh YMA te chungah lawm thu a sawi a, he centre din a nih theih nana sawrkar kaltate’n hma an lolak tawhna te fakin, khawtlang hruaitute inpekna leh inlungrualnate chu lawmawm a tih thu a sawi a, Multipurpose centre a nih ang ngeia kawng hrang hranga ram leh hnam tana chhenfakawm, inlungrualna leh inpumkhatna thlentu lo ni deuh deuh se tiin duhsakna a hlan a ni.

Multipurpose Community Centre hawnna inkhawmah hian UD&PA Director Pu Jacob Lalawmpuia hnen atangin report ngaihthlak a ni a, report-a tarlan a nih danin Multipurpose Community Centre hi State sawrkar sum, state fund atanga sak niin cheng nuai 500 senga sak a ni a, a satu (contractor) atan ZT Powers Chanmari te rawih niin, October 2021 atang khan sak tan a ni a, September 2025 ah sak zawh fel a ni. Chhawng thum awmin chhawng tinte hi 462.20 Sqm-a zau theuh an ni a; kawngpui an (ground floor) hi parking tura ruahman niin Car 20 leh two-wheeler 20 vel dah theihna a ni a; chhawng khatnaah Govt. Primary School awmin, chhawng hnihnaah Library, Meeting Room, Kirtchen/Pantry, Office leh Conference Hall mi 200 lenna awmin, mipa leh hmeichhe tan inthiarna room hran a awm bawk a; chhawng thumnaah Badminton hall leh inthlakna pindan awmin, Carpet tha chi Lining Company kutchhuak, 4.50mm a chhaha thuam a ni bawk a ni. Hawnna inkhawm hi Pi Zarzokimi, UD&PA Joint Secretary chuan lawmthu sawiin a khar a ni.

Minister hian Multipurpose Community Centre a hawn hnu hian Aizawl khawpuia mipuite chawlh hahdamna tur ‘Aizawl Dawh-Rem’, Zodin Square ami chu a hawng leh bawk a. A hming ‘Dawhrem’ a nih ang ngeia inrem tak leh inlungrual taka mipuite’n chawlh hahdam nan leh inkawmhlim nana an hman turin a hawng a ni.

Aizawl Dawh-Rem hi state sawrkar sum atanga din niin cheng nuai 145 senga din a ni a, Contractor hi LHM Infra, Khatla niin May 2023 khan sak tan a ni a, October 2025-ah sak zawh a ni.

Aizawl Dawh-Rem ah hian In hnuai kawngpui an-ah two-wheeler parking, Self Help Group Show Room leh Storeroom te a awm bakah, in chhawnglaita hi Sanitation Site Office tur atan hawn thar a ni nghal bawk a; A enkawl zui tur hian Mizoram Florists Association-te nen inremna siam niin anni hian kum khat atan cheng nuai khatin an cheiin an enkawlzui dawn a ni.