Chief Minister-in 24Megawatt Turini Small Hydel Project (2x12MW) lungphum a phum

Hnahthial Post | January 19, 2025, Sesawng: Vawiin khan Chief Minister Pu Lalduhoma chuan 24 Megawatt Tuirini Small Hydro Electricity Power Plant dinna tur lungphum Tuirini kamah a phum.

Pu K. Sapdanga, Home Minister chu khualzahawm niin P&E Minister Pu F. Rodingliana chuan lungphum inkhawm a kaihruai a, Pu B. Lalchhanzova, I&PR Minister leh Lt. Col. Clement Lalhmingthana, MLA te chuan Chief Minister hi an tawiawm a ni.

He power plant hi Externally Aided Project sum hmanga cheng 676.98 crore senga thawh tur niin New Development Bank, Sanghai atanga loan Rs. 676.98 Crore hmanga thawh tur a ni.

Thusawiin Chief Minister chuan, power siamchhuahna lama hma kan sawn theih nan Power Minister leh P&E Department-a thawktute inpekna a sang em em a. An chungah lawmthu ka sawi a ni. Thla hmasa lawk khan Thenzawl Solar Power Plant, Megawatt 10 pe chhuak thei kan hawng a, Sumsuihah Megawatt 5 pe chhuak thei tur Solar Plant kan thawk mek bawk a, hna zaa 20 kan thawk tawh a. Thenzawl leh Sumsuih solar plant hi Mizoram ta liau liau a ni. Tunah 24 Mw Tuirini lungphum kan han phum leh a, 132 Mw Tuivai pawh chak taka bawhzui zel a ni.

Central sorkar hian power supply lama India ram a intodelh theih nan kawng hrang hrangin hma a la a, mahni mamawh khawp power nei lo state-te tan power leina sum leh pai a hautak tial tial a. Chuvang chuan, kan mamawh khawp power thar thei tura chak taka ke kan pen a ngai a. Chu mi kawnga kan hmalakna pawimawh tak chu vawiina a lung kan phum 24 Mw Tuirini hi a ni a. Chak taka thawh a, a hun taka zawh kan tum ang, a ti.

Hna hi kum 5 chhunga zawh tura duan a ni a, power house-ah hian Megawatt 12 pe chhuak thei khawl pahnih, an pahnih belhkhawm 24 Mw tling tur bun a ni ang.

Chief Minister thusawi pawimawh dangte chu:

1. Tuivai Hydro Electric Project hi Central Water Commission (CWC) in 210 MW thar chhuak thei turin a duang a, tuikhuahin Manipur state hmun thenkhat a chim dawn avangin tihtet deuh thain kan hria a, MW 132 thar chhuak turin ruahmanna kan siam a. Department of Economic Affairs, Ministry of Finance-in DPR te siam tha a, Private Developer tha thlang a, tender chhuah a, state sorkarin Agreement kan sign pui thlenga kan buaipuina tur - Transaction Adviser ruatna atan cheng 2.3 crore min rawn pe a. Khawvel huapa firm tha leh lar, Ernst & Young LLP te chu kan thawhpui ta a. Tunah hian DPR hi peih fel a ni tawh a. A thawhna tur sum ruahman a nih veleh tuikhuah tan mai theih a ni tawh a ni.

2. Tlawng Hydel Project tur hi DPR ennawn mek a ni a. Central Water Commission (CWC) in an buaipui a. Chu mi tana pawimawh leilung chhungril zirchianna Drifting Work chu M/S Benjamin Lalparmawia, Hlimen hnenah work order ni 3, January 2023 khan pek a ni. Tlawng Hydel Project DPR hi September 2026 ah zawhfel hman beisei a ni.

3. Tualchhunga solar power tharchhuah tihpun nan private developer-ten Solar Plant hmun 5-a an siamna tur Expression of Interest (EOI) chhuah a ni a, reiloteah a thawktu tur thlan fel a ni ang. Chung hmun pangate chu:

Tumtuitlang, Serchhip Vengchung

Bawkmual, Hmunhmeltha, Champhai District

Denlung Ram, Hnahthial district

Tlabung Tlang, Lallen, Mamit District

Dawhzau Zau, Lamzawl, Saitual District

Village Council (VC) 75 laiin an ram chhungah solar plant bunna tur ram a thlawna an pek theih thu ziakin an rawn thehlut tawh a, a tahtawla hmalak zel kan tum a ni.

4. Tunah hian Rooftop solar hi 791 installation bun fel tawh a ni a, heng atanga power tharchhuah (installed capacity) zawng zawng hi 2.62 MW lai a ni tawh a ni. He dinhmun kan thlen theih chhan hi central subsidy 60% bakah state sorkarin state subsidy 20-25% (Location a zir) lai a pek tel vang a ni.

5. Vankal Solar Park bul Tuichang luiah Pump Storage Project tur buaipui mek a ni bawk.

6. Generating lamah intodelh rih lo mah ila, Central Generating Station nena long term Power Purchase Agreement kan nei nual a. Central Generating Station atanga kan dawn kan quota-te kan hman sen loh lai hian, hralh theih power surplus, a bikin chhunah te, zan rei lamah te a awm thin a. Chung kan quota kan hman sen lohte chu (bill kan pek that avang khan) kan hralh ta thin a ni. Power bill a hun taka pek loh hian, hralh tur kan neih ve te kan hralh chhuah lehna kawngah inkhuahkhirhna (regulation) a awm thin a. Bill invoice date atanga chhiar a ni 70 chhunga power bill kan pek loh chuan NERLDC chuan power trading ti theilo turin min block nghal thin. Kan sorkar hian a hun taka bill kan pek thin avangin rebate kan dawng a, duh thala power trading kan tih min phalsak a.

Kan sorkar ve hnua power trading atanga kan sum hmuh zawng zawng hi Rs. 172,08,65,724 (vaibelchhe za sawmsarih pahnih chuang) a tling tawh a, chuta tanga kan hlep chu Rs. 87,21,40,250 (vaibelchhe sawmriat leh pasarih chuang) lai a ni a. Power bill pek that avanga Rebate kan hmuh tawh zawng zawng hi Rs. 6,57,93,152 a ni tawh a, rebate hmu thei khawpa kan chet that avanga power trading atanga kan hlep chin kha vaibelchhe sawmriat leh pasarih chuang a ni bawk si a. Bill pek that vanga hlawkna kan hmuh tawh zawng zawng chu Rs. 93,79,33,402 tihna a ni, tiin a kaihhruai sorkarin power lama hma a lakna tlangpuite a tarlang.

7. Mizoram pumah online hmanga electric bill pekna nikum August thla atang khan kan nei a. Smart Meter vuah chhoh mek niin vuah vek kan tum a, electric hrui him zawk Ariel Bunch Cable kan zam mek a, electric la luh lohna leh line chhia vanga eng nei zui tawh lo khaw 29 te chu eng pek vek tumin hnathawh mek a ni.

Chief Minister hian 24 Mw Tuirini tha taka an thawh theih nan mawhphurtute duhsakna a hlan a, a chhehvel khaw hrang hranga mipuite pawh sorkar hmalakna tha taka tawiawm turin a sawm a ni.

Khualzahawm Pu K. Sapdanga pawhin thusawiin hun reilote chhunga hmasawnna duhawm tak tak kan hmu chho mawlh mawlh hi kan lawm a. Vawiina a lung kan phum Tuirini hi a puitlin hunah chuan Mizoramin kan puala kan neih len ber a ni dawn a, a hlu hle a ni, a ti.

Tuirini Project chanchin tawi:

5 February 2024 khan P&E Department chuan Externally Aided Project (EAP) hnuaia thun turin proposal state sorkarah a thehlut a, State Level Screening Committee chuan 4th April, 2024 khan a ngaihtuah a, a approve a. Department of External Affairs (DEA) Screening Committee chuan ni 28 February 2025 khan External Funding turin a rawn approve ta a ni.

New Development Bank-in a funding tura tih a ni a, project cost 80% hi loan angin NDB atangin lak a ni ang a, central sorkarin a rul ang a. Project Cost atanga 20% hi state sorkar tum ve tur a ni. Total cost of Project hi Rs. 676.98 Crores a ni. Kum nga (5) chhunga thawh zawh tura ruahman a ni.

Lungphum inkhawmah hian Pastor B. Lalthlamuanan hunserh a hmang a, Er. JH Malsawma, E-in-C, P&E leh Er. C. Ropianga, Project Director, Tuirini PMU ten thu an sawi a, Pi K. Lalrinzuali, IAS, Secretary, P&E chuan lawmthu sawiin inkhawm a khar a ni.