Mizoram Larsap hovin State Level Ex-Servicemen Rally hmang

Hnahthial Post | February 7, 2026, Aizawl: Mizoram Governor General (Dr) Vijay Kumar Singh, PVSM, AVSM, YSM (Retd) leh First Lady Pi Bharti Singh te chuan vawiin khan State Level Ex-Servicemen Rally, Lammual, Aizawla buatsaih an hmanpui. He hun hi Home Minister Pu K. Sapdanga chuan a telpui bawk.

Governor General (Dr) Vijay Kumar Singh chuan ram tana Ex-Servicemen-te huaisenna, inthununna leh hnaa inpekna chu entawntlak a tih thu a sawi a. Mizoram Ex-Servicemen League member-te chu India rama Ex-Servicemen a hmuh tawhte zinga inchei nalh leh zahawm ber an nih thu sawiin, "Hei hi Ex-Servicemen-te inchei dan tura mawi leh entawntlak a ni", a ti a. Mizo mipui leh sipai inkarah muanna, remna leh inzahtawnna a awm thu sawiin, mipuite leh sipaite'n inlaichinna tha tak an nei a, he rally pawh hi inzahtawnna, inrinngamna, thawhhona leh induhsaktawnna lantirna a ni, a ti bawk.

Governor chuan Ex-Servicemen-te nunah mahni inphatna leh inpumpekna entirna ataka hmuh theiha a awm thu sawiin, an service chhungin chhungkaw bulah pawh awm lovin India ram hmun hrehawm tak takahte an awm kual a, anmahni avangin kan him thin a ni, a ti a. An that lai hun tam zawk ram tana hlantu Ex-Servicemen leh an chhungte puala Medical camp buatsaih a ni leh pension, hamthatna leh chhawmdawlna an dawn chungchanga vuivaina thlenna tur Grievance Redressal Cell siam a ni chu lawmawm a tih thu a sawi a, rah tha a chhuah ngei a beisei thu a sawi a. An tan medical camp lian tham leh changtlung zawk neih tuma hmalak a nih thu a sawi bawk a. Mizoram sawrkarin Ex-Servicemen leh an chhungte hamthatna a ngaih pawimawh thu sawiin, zonun zemawi 'Tlawmngaihna' chawinungin Ex-Servicemen-te kan zaha kan tawiawm zel a tul a ni, a ti bawk.

Home Minister Pu K. Sapdanga chuan ram tana inhlante leh ram zahawma min siamtu Ex-Servicemen-te puala rally neih a ni chu ropui a tih thu sawiin, anmahni avangin India chuan beiseina sang tak kan nei a ni, a ti a. Ram tana an thatlai hun tam zawk hmanga ram ralti leh hrehawm tak taka awm thinte ngaihsanawm a tih thu sawiin, duty an dah pawimawh hmasa tlat thin chu fakawm a tih thu a sawi a. Mizoram mipuiin Ex-Servicemen-te inpekna an hriatreng tawh dawn thu sawiin, tunah ralthuam tung rih mahse, khua leh tui entawntlak an nih chhunzawm zel thu a sawi a. Thalaite fuih phurtu leh entawn ni zel tura chahin, thalaite pawh an hnen atanga inzira, ram leh hnam tana mi tangkai nih tum theuh turin a chah a ni.

He hunah hian Maj Gen Inderjit Singh Bhinder, Inspector General, Assam Rifles (East) chuan inlawmna thu sawiin, Lt Gen Abhijit S Pendharkar, UYSM, AVSM, YSM, Corps Commander, 3 Corps hnen atangin thusawi ngaihthlak a ni a. Lt Col Clement Lalhmingthanga (Retd), MLA, President, Mizoram Ex-Servicemen League (MESL) chuan lawmthu sawiin hun hman a khar a. Hemi hnu hian Governor-in rally puala stall hrang hrang siamte a tlawh kual a, Ex-Servicemen-te kawmin hun a hmang zui a ni.

Vawiin hun hmanah hian Ex-Servicemen (ESM) 9, sipai huaisen chawimawina dawng 1 chhungte leh ram tana nun hlantu sipai nupui (Veer Nari) 5 te hnenah chawimawina leh tanpuina hlan a ni.

Chawimawina leh tanpuina hlante:-

1) Hav Lalbiakthanga Pachuau, Padma Shri

2) Pu Saihmingliana Sailo F/o Capt Lalrinawma Sailo, Kirti Chakra

3) Hony Capt Lalhuapzaua (ESM)

4) Sub Laltana (ESM)

5) Sub Sangchhunga (ESM)

6) Hav Lawmthanga (ESM)

7) Nk Ramfangzauva (ESM)

8) Nk Lalthankama (ESM)

9) Sep S. Vanlaltana (ESM)

10) Sep Selkhuma (ESM)

11) Pi Belsangi (Veer Nari) W/o Nb Sub Laldalliana