Mizorama MSME te inchherhriamna tur project Chief Minister-in a hawng

Hnahthial Post | February 12, 2026, Aizawl: Vawiin khan I&PR Conference Hall-ah Chief Minister Pu Lalduhoma chuan Confederation of Indian Industry Centre for Excellence on Employment & Livelihood (CII CEL) leh Mizoram sorkar tangkawp buatsaih Micro & Small Entrepreneurs Excellence Project in Mizoram leh Mizoram Entrepreneurs Development Forum a hawng. Heng hmalakna pahnihte hi Mizorama MSME neitu, hmasawn zel tumte intuaihriam nana buatsaih a ni.

Thusawiin Chief Minister chuan, Mizote hi tunhma atanga thiam thil ngah tak hnam kan ni a. MSME lamah hmakhaw eng tak kan nei. Nikumah khan IndiaSkills Competition-ah Mizo thalai eng emaw zat ten lawmman an rawn dawng a, kuminah pawh Indiaskills NE Championship-ah Mizo thalaiten Overall Champion an rawn hawn leh a ni.

Kan ramin dehchhuah a neih a, hnathawh tur a lo pun theih nan heng kan thalai skill nei tha tak takte hi chawikan kan tum a. Kan entrepreneurs te hi an bana kaia dinchhuahtir kan duh a, kan flagship scheme Handholding hian an tan remchang a siamsak mek a.

Kan MSME neitute pawh hi skill nei tha, mahnia eizawnna bul lo tan a, tha taka lo kalpui tawhte an ni a. Tuna an dinhmun atanga sang lehzuala an lawn theih nan he Project hi kan buatsaih leh ta a ni.

Khawvel a changkang zel a, sumdawn dan changkang zawk a piang mawlh mawlh reng a. Kan MSME te pawh hmasawn zawnga an kal ve zel loh chuan an hnungtawlh mai ang tih kan hlau a ni, a ti.

Anni kawng kawhhmuh tur hian CII tluka tha hi India ramah an awm lova. CII CEL hian state dangah pawh hetiang hmalakna hi an kalpui a, an hlawkpui em em a. MSME neituten man chawia kal an inchuh hial thin. Keini erawh chu kan vannei a, Volvo Group lamin an CSR hmangin kan senso te min tumsak an remti hlauh mai a. A thlawnin kan MSME neitute an kal thei dawn a ni, a ti a. CII CEL chungah leh Volvo Group chungah lawmthu a sawi a ni.

Chief Minister-in a hawn projects pahnihte hi Mizoram MSME neitu, an hnathawhna lama hmasawn zel duh, tunlai thiamna thar ber ber nena intuaihriam duhte tana buatsaih a ni a. Mithiam zawkte nena an mamawh sawihona (Forum) pawh siamsak an ni ang a. Kum khat chhung kalpui phawt tur niin, mi 70 te training tura thlan an ni.

A hawnna inkhawm hi Pi Shalina Thapa, Executive Director, CII in a kaihruai a, Pu GV Rao, Director, CSR, Volvo Group Trust leh Pu Shivek Gurubaran, Director, CII CEL te pawhin thu an sawi a ni.