Naupang kum tling lo inneih venhim kawnga inzirtirna ni 100 awh Siahaah neih a ni

Hnahthial Post | February 18, 2026, Aizawl: Vawiin chawhma dar 11:30 A.M. khân Mara Autonomous District Council, Golden Jubilee Hall, Council Vaih Siahaah 'Naupang kum tling lo inneih venhim kawnga inzirtirna ni 100-awh' neih a ni a, Pi Hepaw Hlychho, Child Development Project Officer, Siaha chuan a hmanpui.

Thu sawiin Pi Hepaw Hlychho chuan 'sawrkarin mipui tana ruahmanna (scheme) a duan zawng zawng hi kan tana thil ṭha leh ṭangkai a ni ṭhin, vawiinah kum tling lova nupui pasal neih chungchang chipchiar zawka inhrilhhriatna hun hman a ni chu lawmawm a tiin kalkhawmte a lawmpui' thu a sawi. Veng hrang hrang aṭanga kal khawm an nih angin an awmna vengah leh kohhran ṭheuh vawiina an thil zir leh hriatte sawidarhtu nih tum tura chahin, 'Nute hi ṭawngduh tih kan ni ṭhin a, sawrkar ruahmanna sawi chungchangah chuan ṭawngduh nih kha a pawi lo va, kan sawi darh lo mah mah ṭhin hi a pawi zawk a ni,' a ti.

Vawiin hun hmannaah hian Pi Lalsiampuii, DCPO Siaha chuan 'Prohibition of child marriage act' zirtirna a nei a, Pu Kennedy Vanlalchunga, Account, DHEW in 'Mission Shakti' chungchang a zirtir a, zawhna leh chhanna bakah sawihona hun hman a ni.

District Hub for Empowerment of Women (DHEW) leh Women & Child Development, Siaha buatsaih vawiin hun hman hi Pu Kennedy H. Vanlalchunga, Accountant, DHEW-in a kaihruai a, Siaha khawpui chhunga Anganwadi Centre hrang hranga thawktute leh department official an tel a, Pi B. Zishia, District Mission Coordinator-in lawmthu sawina a nei a, hun hman tihtawp a ni.