Hnahthial Post | March 17, 2026, Aizawl: Nimin khan Assembly Annex Conference Hall-ah Assembly House Session chhun chawlh laiin Chief Minister Pu Lalduhoma chuan kum 2026-27 sorkar kum chhunga kalpui tur Mizoram Universal Health Care Scheme 2.0 leh MUHCS Call Centre a hawng.
A hawnna inkhawmah hian Pi Lalrinpuii, Health Minister chu khualzahawm a ni a, Speaker, Minister, Adviser to CM leh MLA eng emawzatten an telpui.
Thusawiin Chief Minister chuan, Mizoram Universal Health Care Scheme chuan kum hnihna alo chuangkai ta a. Tluang taka he scheme a kal theih nana tha leh zung sengtu zawng zawng te leh MUHCS zawmtu hospital-te chungah lawmthu ka sawi a ni.
MUHCS kum khatna kha uluk takin kan zir a, sum leh pai pawh kan seng nual a. Nimahsela mipuite tana a thatzia kan hmuhin sum leh pai senso hi tam tham deuh mahse insen zel kan huam. Tun budget tharah hian Rs. 130 Cr. kan dah a, sorkar hnathawk contribution hi Rs. 26.42 Cr vel a ni a, Asian Development Bank atangin Rs. 800 Cr chuang kan puk bawk a. MUHCS 2.0 hi a hma aia tha zawka kalpui kan tum a ni.
Mipuiten inziahluhna hun hawn mek hi bawh pelh lo ila, hun bituk pawn lamah inziahluh theih a nih loh avangin a hunbi hi ngaipawimawh ang u, a ti.
Inziah luh hun hi April ni 15, 2026 thleng hawn tur a ni a, May thla khar a ni ang a, June thlaah thla khat chhung “Grace period” hawn leh a ni ang. Grace period-a inziah luhna man erawh chu hun pangngaia inziah luh man aiin zaa sawmnga (50%) in a sang tawh ang.
Chief Minister hian, MUHCS kan kalpui mek danah emergency emaw nunna atana hlauhawm enkawlna pek kawngah empanelled damdawiin ni lova inenkawl theihna (provision) siam a ni a. He dan hi kan ennawn a MUHCS 2.0 ah hian khauh zawka kalpui kan tum.
Heng:
1) ICU a admit nghal ngai damlo
2) Nunna chhan nana zai nghal ngai damlo
3) Accident vanga zai nghal ngai damlo
te chauh hi MUHCS hnuaia emergency/life threatening provision-in a huam tawh dawn a ni, a ti.
Chief Minister hian Mizoram State Health Care Society te fakin lawmthu a hrilh bawk a. Mizoram State Health Care Society hian February ni 18, 2026 khan International Organization for Standardization (ISO) certification a hmu a, he certification hi Office inrelbawlna tha leh mipui tana service tangkai pek kawnga hmasawnna lawmawm tak a ni. Hei mai bakah hian Mizoram chuan National Health Authority hnen atangin January, 2026 khan AB PM-JAY hnuaia Beneficiary enrolment-ah Best State nihna chu state dang pali (4) rualin a lo dawng tawh bawk. He lawmman hian Mizoram chhunga Golden card nei thei chhungkaw 2,16,584 zinga chhung tin atangin member pakhat talin Golden Card an siam tawh tih a entir a ni.
Mizoram Universal Health Care Scheme hnuaia inziak lut damdawiinte hnena bill pek chhuah hi khaih lak awm lovin tluang taka kalpui a ni a. A inkaihhruaina danin 'thlatin pek chhuah tur' a tih laiin sorkar chuan kartin a pe chhuak thei a. Hei hian sorkarin Universal Health Coverage a dah pawimawhzia leh sum leh pai dinhmun tha tak hnuaia kalpui a nihzia a tarlang a ni.
MUHCS 2.0 hi April ni 1, 2026 atanga kalpui tan a ni ang.
Pi Lalrinpuii, Health Minister pawhin thu sawiin, tun hnaia a bial chhunga nu nau chunga thi chanchin chuan a rilru a tihhrehawm thu leh thihna tuartute a lainat thu a sawi a. Damdawiin lamin tanpui ngai ngawih ngawih an lo hnar mai nia sawi chu a lungchhiatthlak a tih thu a tarlang. Health Minister a nih angin ngaihdam a dil a. Inquiry lak mek a nih thu a tarlang.
Universal Health Care Scheme kalpui a nih dawn khan kan huphurh ve em em a. Nimahsela, tluang takin kan kal ta a. Mipuite pawhin a thatzia an hre chho zel a. Kan lawm hle a ni. Kan kalpui tawh china phai lama kan refer te hi kan rama kan enkawl theih rih loh natnate an ni hlawm a. Refer tur reng reng hian Medical Refer Board an kaltlang zel a, Refer Board pawh kan fimkhur a tul hle. MUHCS 2.0 hi tha lehzuala kalpui kan tum a, mipuiten ngaihven tha ila, a hun takah inziaklut vek ila kan duh a ni, a ti.
MUHCS 2.0 hawnna inkhawm hi Pi K. Lalrinzuali, IAS, Commissioner & Secretary, H & FW chuan a kaihruai a, kal khawmte lawmna thu a sawi a. Col. Lalbulliana, Territorial Commander chuan hunserh hmangin Dr. Lalhriatzuali Ralte, IAS, CEO, Mizoram State Health Care Society chuan lawmthu sawiin inkhawm a khar a ni.
Tags
News