Hnahthial Post | March 17, 2026, Hnahthial: Nimin khan Mizoram State Project Monitoring Committee (MSPMC) atangin Team Leader Er. Sanghrima Chawngthu kaihhruaina hnuaiah member pathum te chuan khum sawm nga (50 beded) awm theihna tur sak mek, District Hospital Hnahthial an endik a. He hunah hian PWD Building Division Senior EE, Er. Zodingliana; Medical Superitendent, Dr. Zosangliani leh Contractor te an tel a ni.
Hospital building leh Staff Quarters sak an enfiah hnu hian CMO Office Conference Hall-ah inkhawm hona hun hman a ni a. MSPMC Team Leader Er. Sanghrima Chawngthu chuan thu sawiin thil tha zawk a chhuah theihna atana Project te hi endik an nih thu a sawi a. Hnahthial District Hospital sak mek dinhmun pawh a hmunah an rawn hmuh tawh thu leh Hospital thawktuten siamrem tul an tih te, contractor te harsatna neih bakah chak zawka hna thawh a nih theih dan tur te chu Committee-ah report theh luh a nih tur thu a sawi a. Committee chuan mamawhte chu chak taka an bawhzui zel tur thu sawiin hetiang hunah hian an hmalakna hmachhawpte chu tualchhunga stake holder, NGOs leh khawtlang hruaitute hrilh hriat ve thin ni se tha a tih thu a sawi bawk.
Pu B. Lalkhawngaihzuala, Member MSPMC pawhin thu sawiin MSPMC in hma an lakna chhan chu thil tha zawk a chhuah theihna tur a nih thu a sawi a. Hnathawktu contractor-ten harsatna an tawh pawh an theihna kawngah an sutkianpui thin thu sawiin hna tha leh tlo, ram tana rotling siam chu an ngaih pawimawh ber a nih thu a sawi bawk.
Khum sawmnga (60 beded) awm theihna tur District Hospital Hnahthial leh Staff Quarters sak mek te hi North Eastern Consultancy Services (NECS) ten cheng vaibelchhe sawm paruk (16cores) chuang sengin an sa mek a ni.
Tags
News