Hnahthial Post | April 23, 2026, Aizawl: Vawiin chawhnu dar 12 khan Mizoram Board of School Education chuan High School Leaving Certificate result ti chhuakin Mizoram pumah Pass percentage 80.31 a ni.
2026 HSLC Result hi kum dang ang lovin Division tarlan a ni lo va, hei hian sawi a hlawh em em a ni. Kumina zirlai HSLC exam tura inziak lutte chu an vaiin 18,612 an ni a, heng zinga mi 355 te chuan exam hi an hmachhawn lo thung a, exam hmachhawn mi 18,257 an ni. Exam laia Zirlai hnawh chhuah an awm lo va, zirlai compartment 117 awmin, zirlai 3,477 te chu vanduaiin, zirlai mi 14,663 te chu hlawhtlinna changin HSLC hi an pass a ni.
Rachel Biakthapari, St Joseph HSS, Aizawl chu topper niin 480 a hmu a ni, ani hi East Lungdar khua niin, Salai Chanuk fanu ni.
MZP President, Dr C Lalremruata chuan Social Media kal tlangin, hlawhtlinna chang zawng zawng thinglung takin a lawmpui thu leh hlawhtlinna chang pha lo te pawh beidawng mai lova, bei nawn fan fan turin a sawm a; Zirna In, zirlai fail vek awmna te chu zirtirtute a dem thu leh kum khat chhunga an hnathawh an hlawhchham chiang hle tih tarlangin, Sorkarin chung Zirna In te chu insawifiah turin ti ngei rawh se, a ti bawk.
MZP chuan ni 28 April, 2026 (Thawhlehni) hian Mizo Zirlai HSLC top 10 - a tling te Vanapa Hall-ah chawimawi an tum thu a tarlang tel bawk a ni.
***** ***** ***** ***** ***** ***** ***** ***** *****
Hnahthial Post chuan, Mizoram Board of School Education-in HSLC Examination a buatsaiha hlawhtlinna chang zawng zawngte thinlung takin kan lawmpui a che u. He hlawhtlinna ropui tak hi in thawhrimna, chhelna leh inpekna rah a ni.
In hlawhtlinna hian in chhungte leh in zirna in te chauh ni lovin, kan khawtlang pawh min tiropui a ni. In zirna kawng lehpek in zawh leh turah hian, tumruh tak leh rinawm taka hlawhtlinna sang zawk thleng turin kan fuih che u a ni.
He hlawhtlinna hi in hma hun atana lungphum nghet tak ni rawh se. He hlawhtlinna thlen theihna atana zirtirtute, nu leh pate leh duhsaktute thlawpna leh kaihhruaina hlu tak kan hriatpui a, kan lawm hle a ni.
Hlawhtlinna chang zawng zawngte kan lawmpui nawn leh a che u. In hma hun lo awm turah duhsakna sang ber kan hlan a che u.
Tags
News