Minister Pu Lalnghinglova Hmar chuan Khawbungah International Seminar on Mizo Hlakungpui Mual Thawh Rukna hmanpui

Hnahthial Post | April 8, 2026, Aizawl: Tourism Minister Pu Lalnghinglova Hmar chuan vawiin khan International Seminar on Mizo Hlakungpui Mual Thawh Rukna, 2026, Khawbunga neih chu khuallian niin a hmanpui. Adviser to CM Pu Lalmuanpuia Punte chu khual zahawm a ni bawk.

Khuallian Pu Lalnghinglova Hmar chuan thu sawiin, Khawbung khua chu mahni inchawimawi thiam tak leh khaw inlungrual an nih thu leh khaw entawn tlak tak an nih thu a sawi a, khawi hmunah pawh awm ila, mahni chawrchhuahna hre reng te an hmingmawi thin, a ti a, ram dang leh state dang mah hian haw runpui pawh an nei ve ngai lova, Mizo te chauh nei thin an nih thu a sawi a, an khua an hmangaihna chu an thil neih ropui tak a nih thu sawiin an khua an hmangaihna pung zel turin a chah. Cheng nuaih 25 sengin Khawbung Volleyball Court an siam tur thu a tarlang a, football leh volleyball bakah Volleyball net te a hlan a, Mizo Hlakungpui mual seminar puala buatsaih souvenir "Zo Tui" tih lehkhabu a tlangzarh nghal a ni. Minister hian Mizo Hlakungpui Mual a tlawh nghal a ni.

Khual zahawm Pu Lalmuanpuia Punte chuan thu sawiin Pu Patea leh Pu Damhauha te pahniha bultan a, Hlakungpui mual an buatsaih chu tunah Mizoram puma hlut hlawh khawpa an buatsaih thei chu lawmawm a tih thu a sawi a, Pu Patea leh Pu Damhauha te chanchin ziahna lehkhabu a tlangzarh ve bawk.

He hun hi Khawbung Vengpui Kohhran Centenary Hall-ah hman niin Pu H. Lalnunmawia, Vice Chairman, Hlakungpui Mual Committee chuan a kaihruai a, Mizo hlakungpui muala seng luhte thu leh hla zirho a ni. Kum 1986 khan a thawh khatna neih a ni a, kum 1996 khan a thawh hnihna neiin kum 2006 khan a thawh thumna neih leh a ni a, kum 2011-ah a thawh li na neiin kum 2016 khan a thawh ngana neih leh a ni a, kumin hi a thawh rukna a ni. Resource person te chu Zalianthanga, Journalist, Tahan; Lalzuitluanga, Assistant Professor, Churachandpur College; leh Dr. Sangrozami, Associate Professor, Govt. J. Thankima College te an ni.