Hnahthial Post | May 23, 2026, Aizawl: MZP chuan MPSC buatsaih Jr. Grade of MAH&VS Direct Recruitment chungchangah thil fello a awm ngei niin a hria a. Hemi chungchangah hian ni 15 May, 2026 (Zirtawpni) khan MPSC thuneitute hmuh niin sawipui an ni a. He hnalak chungchanga thil fello te siamthat ngei a nih theih nan MZP chuan MPSC thuneitute hnenah hian alo thlen tawh a ni. Hemi tuma MZP-te Controller of Examination, MPSC-in thudik tawk lo, “Jr. Grade of MAH&VS Direct Recruitment hi Exam ala nih loh thu” min hrilh leh MPSC Secretary roomah ngei pawh chutiang ang thu Controller of Examination-in a sawi chu MZP chuan hriatthiam har a ti a. MPSC zahawmna a bo mai loh nan hetiang thil hi thleng nawn tawh lo se a duh tak zet a ni.
He hnalak chungchangah hian ni 27 April, 2026 khan MPSC chuan Written result a tichhuak a, Post 4 (pali) lak tur a nih laiin Written result chhuakah mi 3 (pathum) chauh tih tlin an ni. He hna diltu zingah MPSC-in ni 24th October, 2025-a Valid list a tihchhuahah mi 101 (za leh pakhat) an awm a. Chung zinga mi 74 te chuan Written Exam hi an hmachhawn a ni. Ni 7 April, 2026-a Written result chhuakah mi 3 (pathum) chauh an tling chu mak tiin MPSC lam zawhfiah an ni a, Written Exam hmachhawn zinga mi 71 (sawmsarih leh pakhat) ten Written Exam an paltlang loh chhan chu MPSC online Form/Portal-ah Veterinary Council registration an upload loh vang niin MPSC lam chuan an sawi a ni.
MZP chuan he hnalak chungchangah hian Free and Fair a awm ngei theih nan zirchiang-in hma ala a. MPSC-in Valid List a tih chhuah thlap tawh leh Written Exam hmachhawn thlap tawh mi 74 (sawmsarih leh pali) zinga 71 (sawmsarih leh pakhat) te reject/disqualified an ni leh chu hriatthiam har a ti a. Thil diklo leh fello a awm ngei niin a ngai a ni.
MZP-in a zirchianna-ah mi 71 (sawmsarih leh pakhat) reject/disqualified te hnen atangin MPSC form, online portal an fillup lai hian Veterinary council registration certificate upload na tur option/slot a awm loh thu leh online form-ah hian Others tih option pawh an fillup hunlai _(i.e 11/09/2025-10/10/2025, 5:00pm)_ hian a awm loh thu hriat a ni a, chuvang chuan MPSC website lamah technical problem a awm theih avang leh Valid List tihchhuah tawh candidate zinga Written Exam hmachhawn mi 71 (sawmsarih leh pakhat) ten hetiang harsatna an tawk hi MPSC lam Management fel tawk loh vang-ah MZP chuan angai a, Innocent candidate te tawrh tir lo turin MPSC thuneitute chu a ngen bawk a ni. Tin, MPSC thuneitute chu an thil tih dik tawk lo-ah mawh phurhna la ngam tur leh he recruitment process zawng zawng pawh hi ni 29 May, 2026 (Zirtawpni) hma ngeia a bul atanga tan that a nih theih nana hma la turin MZP chuan MPSC thuneitute chu a phut tlat bawk a ni.
Tun hnaiah MPSC hian hnalak an kalpui tawh leh hnalak an kalpui mekah an tal buai nasain, tihsual an ngah em em a. MZP chuan Sawrkar thuneitute hnenah MPSC thuam chak tura vawi engemawzat alo thlen tawh chung pawha vawiin ni thlenga MPSC-in Full Commission an la nei thei lo chu MZP chuan mak a tiin hriatthiam har a ti hle a, MPSC in harsatna an tawh hi a rang thei ang bera chingfel turin Mizoram Sawrkar thuneitute a ngen bawk a ni.
