Hnahthial Post | July 9, 2026, Aizawl: Nimin khan Mizoram sawrkar hnuaia Rural Development & Administrative Department (RD&AD) buatsaihin VIKSIT BHARAT - GUARANTEE FOR ROZGAR AND AJEEVIKA MISSION (GRAMIN): VB-G RAM G hawnna hun Vanapa Hall-ah neih a ni. He hun hi RD&AD Minister Prof. Lalnilawma chuan khuallian niin a hmanpui a, VB-G RAM G hawnna a nei nghal a ni.
Khuallian Prof. Lalnilawma chuan kalkhawmte chibai a buk a, ni 100 inhlawhna mipuiten an hman ṭangkai dan te a sawi a. VB-G RAM G pawh Mizoram sawrkarin a hlawhtlin theih nan theih tawp a chhuah nghal a, India ram pumah a scheme notification chhuah hmasa ber RD&AD Mizoram an nih thu a sawi. State sawrkarin VB-G RAM G a tum ve tur cheng vaibelchhia 128 pawh CM leh finance lam ten ngaipawimawhin, sum lamah pawh harsatna a awm dawn loh thu a sawi bawk a ni. A hlawhtlinna tak tak erawh mipui te, VC te, official te thawhhonaah a innghah tur thu a sawi.
Minister chuan India-in zalenna a neih kum 100 a tlin lawmna kum 2047-ah chuan India chu developed country a hlan kai tum anih thu a sawi a. MGNREGA scheme-ah chuan Ni 100 inhlawhna leh Community assets din a ngaipawimawh a. VB-G RAM G ah erawh chuan India kum 2047-a ram changkanga hlang tura a ruahmannaah mipuiten mawhphurhna kan nei a ni a ti.
Minister chuan VB-G RAM G scheme-in a ngaihpawimawh pakhat chu Tui hnianghnar taka neih (Water security) a ni a ti a. PHE nen ṭangkawpin tuikhuah rintlak tak siam an tum thu a sawi a, India leh Israel sawrkar ṭangkawpin Mizoramah tui hnianghnar taka a awm zel theih nan hmalakna kalpui mek a nih thu a sawi bawk. He scheme thar hnuaiah hian ni 125 inhlawhna hi mipuite eizawnna nen inkungkaih tlat niin department dangte nen ṭangkawpin changtlung zawk eizawnna duang tura hmalakna kalpui mek a nih thu a sawi bawk.
Minister chuan VB-G RAM G-in a tum ber pakhat chu kan khawtlang tih hmasawn a ni a, khawtlang leh mimalah ṭheuh hmasawnna a lo thlen chuan Viksit Bharat hi kan thleng thei dawn a ni a ti.
RD&AD Commissioner & Secretary Pu R. Zarzosanga chuan kalkhawmte lawmna thu a sawi a, VB-G RAM G scheme chu kum 2005 a hman ṭan MGNREGA thlakna atan sawrkar laipuiin July ni 1 a hman ṭan tura duan a nih thu a sawi. Pu R. Zarzosanga chuan VB-G RAM G hnuaiah ni 125 inhlawhna siam a nih tur thu te, kum khat chhungin ni 60 Farming season-ah chawlh siam a nih tur thu leh he scheme thar hi thingtlang lama eizawnna siamtu pawimawh tak a nih zel tur thu a sawi bawk.
RD&AD Additional Secretary Pu V. Lalengmawia'n powerpoint presentation hmangin VB-G RAM G chungchang report tawi a pe a. Pu V. Lalengmawia chuan MGNREGA India ram pum a hman ṭhin chu kum 20 chuang hman a nih hnuah, India rama thingtlang khua te chu kum 20 hma lama kan mamawh ṭhin te lo danglamin chumi mil tur chuan VB-G RAM G hi duan a nih thu a sawi. Mizoramah MGNREGA hnuaiah mipuite kan thawk ṭha a, Poverty level 23% 2011 a ni ṭhin kha kum 2026-ah chuan 11% ah a tla hniam ta a. Heng hmasawnna te hi VC-te, RD&AD a thawktute leh mipuite thawhhona avang a ni a ti bawk. VB-G RAM G hnuaiah central sawrkar aṭangin cheng vaibelchhe 611.65 leh Mizoram sawrkar aṭangin cheng vaibelchhe 67.95 dah a nih thu a sawi bawk.
He scheme hi India rama thingtlang zawkte (rural area) hmasawnna tur atana duan niin, India Sawrkar chuan 11 May 2026 khan Viksit Bharat – Guarantee for Rozgar and Ajeevika Mission (Gramin) [VB–G RAM G] Act, 2025 chu ram pumah 1 July 2026 aṭanga hman ṭan turin a puang a ni.
He VB–G RAM G Act hman ni aṭangin kum 2005-a siam Mahatma Gandhi National Rural Employment Guarantee Act (MGNREGA) chu hemi ni vek aṭang hian ṭhiah (repeal) a ni thung. Hei hian India rama thingtlangah hmasawnna tura ruahmanna hman ṭhin chu thlak thlengin, India in ram changkang zinga inhlankai tuma a hmalakna Viksit Bharat @2047 vision peng pawimawh tak pakhat a ni.
RD&AD programme buatsaihah hi RD&AD Commissioner & Secretary Pu R. Zarzosanga chuan kaihruaiin, Pastor Lalrohlua Fanai chuan hunserh a hmang a; Village Council Association te, Job Card holder aṭangin Pu Lalnelawma (Tlangnuam RD block) leh Self Help Group aṭangin Pi Lalropuii (MZSRLM Tlangnuam RD block) ten thu an sawi bawk. He hunah hian Mizoram sawrkar department hrang hrang aṭangin officials te, VC hruaitute, MGNREGS Job Card Holder te, SHG group nu ho te, kim takin an kalkhawm a. RD&AD Director Pu K. Lalrohlua chuan lawmthu sawiin he hun hi khar a ni.
Tags
News