Health Minister Pi Lalrinpuiin Presidency Bengaluru University a tlawh

Hnahthial Post | Aug 4, 2026, Aizawl: Vawiin khan Health Minister Pi Lalrinpuiin Presidency University Bengaluru tlawhna hun neiin, Minister chu Presidency University Bengaluru Chancellor Dr. Nissar Ahmed, Vice Chairperson, Dr. Nafeesa Ahmed, Vice Chancellor, Dr. S.J. Thiruvengadam, leh Pro Vice Chancellor Dr. Vidya Shankar Shetty te chuan lo dawngsawngin, zirlaite nen inkawmhona hun an hmang.

Minister chuan thu sawiin, zirlaite chu an zirna hmachhawp thar an ṭan turah duhsakna hlanin, entawn tlaka awm turin a fuih a. Zirna sang hi degree neihna tur ringawt a ni lo a, zirna chu mi rintlak ni tura chhertu a nih thu a sawi bawk a ni.

Minister chuan zirlaite chu nun uluk tur leh an mawhphurhna hre reng chunga nung turin a fuih a, ruihhlo leh thil ṭha lo dang laka fihlim turin a chah bawk a ni. Khawvel technology hmasawnna chungchang sawiin, digital awareness pawimawhna leh technology chu zirna atan mai bakah hmasawnna atan hmang ṭangkai turin zirlaite chu a fuih a ni.

Khawvel ram dang nena khaikhinin India chu thalai tamna ram a ni, a ti a. Thalaite chu India ram hmasawnna tur leh dinchhuahna tura ke pen zel turin Minister chuan chah a ni.

Pi Lalrinpuii chuan Mizoram cabinet minister ni tura a zinkawng chu zirlaite hrilhin, hlawhtling tur chuan tumruhna leh beidawng lova beih hram hram a pawimawh thu a sawi bawk.

Zirlaite nen inkawmna hun an hman zawh hnuin Minister chuan Presidency Bengaluru University hmunhma tlawhna hun a nei bawk a ni.