P&E complex Lawngtlaia 'Jio Tower' dah tur chungchangah thukhawm

Hnahthial Post | Aug 25, 2026, Aizawl: Vawiin khan Lawngtlai Bawrhsap Pu Donny Lalruatsanga kaihhruaiin a Office Chamber-ah Power & Electricity Complex - a Jio Tower - dah tur chungchangah thutkhawm a ni.

Pu Donny Lalruatsanga chuan kalkhawmte chibai bukin Jio Tower bun chu Lawngtlai khawpui tana thil tangkai tak a ni a, mobile leh Internet Service - tha zawk a awm theih ngei a beisei awm a ti a. P&E Complex - a Jio Tower dah tura inremna siamfel vek tawh tun dinhmuna 'P&E Staff Welfare' ten hmun danga dah tura ngenna an siam chu hriatthiam har a tih thu a sawi a. Tun dinhmunah bungrua a thlenfel vek tawh avangin ruahmanna siam tawh anga bun theih a nih loh chuan Company - te sum senso ang ang chu an tum a ngaih ve tawh tur thu sawiin, inremna erawh awm se a duh ber thu a sawi bawk a ni.

P&E Staff Welfare- te chuan Jio Tower bun tura inremna ziah an hriatpui ve loh thu sawiin, hmun danga dah chu an duhber a nih thu an tarlang a. JIO Company hotute chuan inremna ziah tawh a nih anga hmalakna kal zelah bungrua a thlenfel tawh thu leh P&E Complex - ngeia dah chu an duhdan a nih thu an tarlang a. Lawngtlai khawpui miten Mobile Tower - dah an duh lo thin leh company tana harsatna an siamsak thin chu hrehawm an tih thu sawiin, Jio hotute chuan P&E Staff Welfare te chu inhnukdawk hram turin an ngen a ni.

Vawiin thutkhawmah hian ngaihdan hrang hrangte sawiho a ni a. P&E Staff Welfare- te chu kar khat chhung hun pek tha tiin, thutlukna felfai tak lo siam tur leh Jio hotute nen pawha lo inbe chhunzawm tura tih a ni bawk.

Thutkhawmah hian Jio hotute leh P&E Staff Welfare bakah SDC, President, MJA Lawngtlai te an tel thei a, Bawrhsap chuan lawmthu sawiin hun a khar.