Cambridge University Press tihchhuah 'Development and the Tribal Question in India' lehkhabu Dr Vanlalthlana'n tlangzarh

Hnahthial Post | Oct 20, 2026, Aizawl: Vawiin chawhma khan BSI Hall, Khatla-ah Cambridge University Press tihchhuah, 'Development and the Tribal Question in India' lehkhabu chu Higher & Technical Education Minister Dr Vanlalthlana'n a tlangzarh. He lehkhabu hi Dr Roluahpuia (Associate Professor, IIT Roorkee) leh Prof. (Retd) Virginius Xaxa (Visiting Professor, Institute for Human Development, New Delhi) te buatsaih a ni.

Lehkhabu tlangzarhtu Khuallian Dr Vanlalthlana, School Education Minister ni bawk chuan thu sawiin, hmasawnna dik tak kan sawi hmain 'tribal' nihna awmzia dik tak kan chhut chian hmasak a ngai a ni, a ti. Kum tam tak chhung tribal-te chu hnam hnufual, ramhnuaia khawsa leh hmasawnna daltu anga hmuh an nih ṭhin thu a sawi a. Hmasawnna ruhrel lian tham, kawngpui siam, tuikhuah, lei hnuai hausakna laih chhuah leh thil siamna hmunpui din a nih hian tribal-te ram leh ngawte chu mipui nawlpui tana ṭha tur chhuanlamin chhuhsak an ni fo a ni, a ti.

India rama tribal-te dinhmun chu a inang lo hle tih sawiin, India laili lama tribal-te chu hmasawnna kawngah an la hnufual hle laiin, Mizoram leh hmarchhak state dangah erawh chuan hmasawnna nasa tak hmuh tur a awm tih a tar lang a. Amaherawhchu, heng hmasawnna te hian tribal-te zingah pawh inthliarna a siam ṭan thu leh, mi tlem tein sum leh pai leh thuneihna an hui luh avanga mi nawlpuiin an tawrh phahna thleng mek chu dan chah a nih theih nan kan zavaia kan ṭan tlan a ngai ni a ti.

Khuallian Dr Vanlalthlana chuan, zirna in sanga zir bingna hmang ṭangkai turin sawrkar chu a inhawng tih a sawi a. Research scholar leh academic-te chuan ram inthlak danglam nan theihna an nei tih sawiin, an thiamna leh an thil zir chhuahte chu sawrkar policy duan nana hman ṭangkai a nih theih nan theih tawp chhuah zel turin a fuih.

He lehkhabu hian India rama hmasawnnain tribal-te a nghawng dan a zir chiang a. India ram hmun hrang hranga tribal-te dinhmun te, Fifth leh Sixth Schedule hnuaia hamṭhatna chungchang te leh hmasawnnain tribal society chhunga inthliarna a thlen dan te chu he lehkhabu hian chipchiar takin a tar lang a ni.

Lehkhabu tlangzarh inkhawm zawhah Dr. Joseph K. Lalfakzuala, Assistant Professor, Govt. T. Romana College chuan hun a kaihhruai chhunzawm a. Lehkhabu aṭanga thupui lak chhuahte sawi hona neih zui niin, he hunah hian Dr Anthony Lalchhuanmawia (Guest Faculty, Pachhunga University College), Dr Kimi Colney (Journalist & ICSSR Post-doctoral Fellow) leh Dr B. Lalzarliana (Assistant Professor, Mizoram University) te chu panelist an ni.