Chief Minister-in Government Mizoram Law College bus pe


Hnahthial Post | October 28, 2026, Aizawl: Vawiin khan Chief Minister Pu Lalduhoma’n a office tualah Govt. Mizoram Law College hotute leh zirlai hruaitute kutah zirlai naupangte hmang tur 24-seater SML Bus thar a pe.


Kumin July ni 31 khan Chief Minister hian Govt. Mizoram Law College Freshers Social & Felicitation Programme a hmanpui a. He mi tum hian an College Student Bar Council hruaituten an College Bus hman lai hlui tawhzia an lo sawi a. Kum 2005 Registration, Polytechnic School-in kum 15 an hman tawh hnu an chhawm zui tak niin zirlai naupangte tana a him tawk tawh loh dante an tarlang a. Chief Minister hian Bus thar a pek tur thu a puang ta a ni.


Chak taka bawhzui nghal a ni a, vawiinah Chief Minister hian a hlan ta a ni.

A hlanna hun tawiteah hian Chief Minister chuan, naupangten tangkai taka an hman a beisei thu a sawi a, India ram huapa dan lama thiamna sang ber ber nei thei khawpa inbuatsaih tura chahin duhsakna a hlan a ni.










Post a Comment

Previous Post Next Post