Siaha-ah Independence Day ropui taka lawm a ni; Minister Pu Lalnghinglova Hmar chuan Khuallian niin a hmanpui

Hnahthial Post | Aug 16, 2026, Siaha: India Independence Day vawi 80na chu nimin khan SDFA Playground, Meisatla, Siaha-ah ropui taka lawm a ni a. Excise & Narcotics Minister Pu Lalnghinglova Hmar chu Khuallian niin, hnam puanzar a pawtpharh a, parade contingent-te chibaibuk a chhanglet a ni.

Minister Pu Lalnghinglova Hmar chuan India ram ‘Zalenna Ni’ vawi 80-naah Siaha District mipui zawng zawngte chu chibai bukin, an inbuatsaihnaah lawmthu a sawi a. Vawiina hun hlimawm tak an hman theihna chhan chu zalenna sualchhuaktu mi huaisen ten harsatna leh hrehawmna pawisa lova mipuite tana an inpekna vang a ni, a ti. Kum 1947-ah kha chuan India ram chu kawng tinrenga ram rethei leh harsa tak a ni thin a; tunah erawh chuan ram hmasawn chak leh changkang pawl a lo ni ta tiin, Minister chuan hriselna kawngah te, zirna kawngah te, eizawnna kawngah te leh thil dang tam takah India ram pumpui chuan hma a sawn em em a ni, a ti a. Siaha district-ah pawh mipui hamthatna atan hmalakna pawimawh tak tak a awm tiin Siaha District a Department hrang hrangte hmalakna a sawi a ni.

Siaha-a Independence Day vawi 80na lawmnaah hian Armed Contingents-2, Unarmed Contingents- 3, Pipe Band - 1 leh School Contingents-17, an vaiin parade contingents 23 an awm a. Lawmman dawngtute chu

School contingents:

1) Little Diamond English School

2) Hill Gate English School

3) Maraland English Academy

Unarmed Contingents:

1) NCC Don Bosco

Pipe band leh Armed Continents ten special prize leh participation prize an dawng bawk.

Nimin vek hian District Education Office buatsaihin District Award for Meritorious and Outstanding teacher lawmman hlanna neih nghal a ni a; Pi K Minary (Teacher, Govt Education Vaih MS ) chuan he lawmman hi a dawng a ni. District Selection Committee chuan Pi K Minary chu zirna lama a thawhhlawk em avang te, a service record a that avang te, school leh khawtlang tana a thawhhlawk em avang leh teaching performance a that avanga thlang an nih thu an tarlang.

Independence Day lawmna programme zawhah hian District Bawrhsap hovin sawm bikten DC Bangla-ah VIP's At Home programme an hmang chhunzawm nghal a ni.