Hnahthial Post | Nov 22, 2026, Gandhinagar: Ni hnih awh India rama Labour & Employment leh Industry Minister leh official-te inkhawmpui, "Chintan Shivir of Labour Employment & Industry Ministers of States/UTs" chu nimin leh vawiin khan Gandhinagar, Gujarat-a Mahatma Mandir-ah neih a ni. Pu Lalnghinglova Hmar, Minister of State (i/c), Labour, Employment, Skill Development & Entrepreneurship (LESDE) Department chu Conference-ah hian telin session pakhat a kaihruai.
India rama Labour & Employment leh Industries Minister leh Secretary te inkhawmpui hi Ministry of Labour & Employment (MoLE) buatsaih niin, Union Labour & Employment Minister Dr. Mansukh Mandaviya leh Union Minister of State Pi Shobha Karandlaje te’n an telpui a ni.
LESDE Minister Pu Lalnghinglova Hmar chuan vawiina 'Labour & Employment Stack, Career Lounges for International Labour Mobility' session chu Union Minister te nen a kaihruai (co-chair) a, Mizoram chu state tê leh mihring tlemna ni mah se, hnathawktute himna’n leh an hamthatna’n theihtawp a chhuah tih a sawi. “Mizo thalai, ram pawna hnathawk turte him zawk leh felfai zawka an kal theihna’n, Mizoram Council for Vocational Training chu Ministry of External Affairs hnuaiah ‘Recruiting Agency’ a register a ni a, Northeast state zingah Recruiting Agency-a sawrkar department nei hmasa ber kan ni. Tin, state pawn leh ram pawna hnathawk tirchhhuak thinte mumal zawka khuahkhirhna tur dan siamthat a ni bawk.” a ti.
Hemi session-ah hian NCS One Portal thar tlangzarh niin, he portal hi hna zawng mekte bakah, skill development leh career counselling mamawhte leh chutiang pe theite thlunzawm a, hman awlsam leh huapzau zawk tura buatsaih a ni a. Mobile app bakah AI tool leh chatbot hman tangkai theih tur dah thar a ni.
Mizoram LESDE Minister chuan sawi chhunzawmin, “PM-SETU hnuaia ITI tihchangtlunna tur project lian kalpui a ni hi thil lawmawm tak a ni. Chutih rualin Mizoram leh state tê dangahte chuan industry lian a awm meuh lo a, a tak taka kalpui turin kan bana kaih a ngaih chang a awm ang,” tiin, Sawrkar laipui scheme kalpui danah state tê zawkte ngaihsak bik an ngai tih a sawi.
NCS Portal leh online app dang tlangzarhte chu Mizoram ang state tê leh kilkhawr zawkte tan a tangkai zual dawn hle tih a sawi bawk.
‘Chintan Shivir of Labour Employment & Industry Ministers of States/UTs’ hawnna hi November 21 khan neih a ni a. Hei hi MoLE in labour kaihhnawih dan hrang hrangte dan thar (Labour Code) pali-a a suihfin kum khatna champha a ni.
Union Minister Dr. Mansukh Mandaviya chuan ram hmasawnna turin hnathawktute hamthatna vawn nun leh industry te tihhmasawn chu a kalkawp a ngai tih a sawi a. “Labour Code thar palite hian hnathawktute tan hamthatna tam zawk a thlen a, chutihrualin a chhawrtu industry te tan pawh zawm tur khirh tak tak tiziaawmin awlsamna a thlen ve bawk” a ti a. “Ram dangten hnathawktu tur thalai an mamawh belh zel rualin India ram chuan hnathawk thei thalai kan ngah hle. Rampawna kan thalaite thawh tur chungchang hi uluk taka ngaihtuah a, kaihhruai a tul hle a ni.” a ti. Sawrkar chuan hnathawktute hamthatna a ngaipawimawh zel dawn a ni a ti a. Nihnih chhunga sawihona leh ‘best practice’ thlirho atangin, a hma aia hmasawn ngei tum turin Minister leh official kalkhawmte a chah a ni.
Kum kal ta chhunga Labour Code kalpui tawh dan leh hmalak zel dan tur ngaihtuahho a ni a; MoLE hnuaia organisation lian pahnih - Employees’ Provident Fund Organisation (EPFO) leh Employees’ State Insurance Corporation (ESIC) kalphung tharte zirho a ni bawk.
Session hrang hrangah te hian State thlanchhuah aiawhte’n ‘Best practice’ presentation neiin, a duh apiang tan sawihona hun hawn zel a ni.
Chintan Shivir-ah hian India rama state 28 leh Union Territory pariat atangin Minister leh official thahnem tak an tel a. Anni bakah Ministry of Labour and Employment hnuaia peng hrang hrang - Directorate General of Labour Welfare, Labour Conference, Directorate General of Employment, Labour Bureau, Employees' Provident Fund Organisation, Chief Labour Commissioner (Central) - atangte in official leh expert thahnem tak an tel a ni. V. V. Giri National Labour Institute (VVGNLI), Noida leh Law University(NLU), Gandhi Nagar, Gujarat te chu Knowledge Partner angin an tel bawk.
Pu Lalnghinglova Hmar hi Mizoram atangin Pu H. Lalramenga, PS in a tawiawm a ni.
Chintan Shivir of Labour Employment & Industry Ministers of States/UTs 2026” a session hrang hrangte:
Day 1: November 21, 2026:
1. Inaugural & Introductory Session
2. Labour Codes – Implementation Status & Way Forward.
3. Employment Initiatives and EPFO Reforms.
4. Employees’ State Insurance Corporation (ESIC) Reforms
5. Social Security for Unorganized Workers & Labour Statistics.
Day 2: November 22, 2026:
1. Labour & Employment Stack, Career Lounges for International Labour Mobility.
2. Discussion on the Outcomes of Break Away Sessions3. Closing session
Tags
News














