Hnahthial Post | Nov 21, 2026, Aizawl: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan Uttar Poorva Transformative Industrialization Scheme (UNNATI), 2024 kaltlanga siam Lengpui Airport kianga mi Hotel Koinonia chu Khuallian niin a hawng.
Hawnna huna thu a sawiah Larsap General (Dr) Vijay Kumar Singh (Retd) chuan khual hipna atana boruak duhawm siam tur leh khualzinte'n tlawh nawn leh an chak state ni thei turin mitinin mawhphurhna kan nei theuh tih sawiin, kan state-in tourism sector-ah theihna nasa tak a neih bawk avangin hmabak eng tak kan nei a ni, a ti. Sum leh pai dehchhuah kawngah tourism pawimawhna a len chhoh zel thu leh khual thlenna changtlung leh dawnsawn dan tha chu tun hma zawng aia a pawimawh zual tak thu a sawi bawk.
Mizoram luhka pawimawh tak Lengpui Airport hnaivaia khualbuk tha tak Hotel Koinonia hawn a ni chuan khualzin, sumdawng leh Mizoram rawn tlawhtute tan remchanna a siam dawn tih sawiin, Koinonia Family-te a lawmpui thu a sawi a. Tourism sector tichangtlung turin khualhipna lam hawi thil thar tha tak tak kan chin chhuah zel a tul tih sawiin, khualzinte'n nuam ti taka hun an hman theih nan leh kan hnam ziarang, nunphung leh tawngte an zir theih nan ruahmanna kan siam sak a tul thu a sawi bawk.
He hunah hian Pu Samuel Vanlalawmpuia, Co-Owner (PoA), Hotel Koinonia chuan kalkhawmte lawmna thu sawiin, Pi Ngurmawii Sailo, Proprietor, Hotel Koinonia-in Larsap thilpek a hlan a. Dr. Vanlalchhanhima Ralte, General Manager (PoA), Hotel Koinonia-in project report a pe a. Dr. R. Lalthangliana, MLA-in lawmthu sawiin hun hman a khar a ni.
Hotel Koinonia-ah hian mikhual thlenna room 25 - Superior Room 15, Deluxe Room 6 leh Suite 4 - te a awm a. Eirawngbawlna choka leh chaw eina 'El Nu Kitchen' awmin, conference, meeting leh programme pawimawh hmanna tur 'Ch Pa Hall' changtlung tak a awm bawk a. Heng bakah hian pawnlera programme hmang duh tan lirthei dahna tha tak leh mi 500-700 vel bawr pun khawm theihna 'Ch Nu Garden' siam a ni bawk.
Tags
News
























