Hnahthial Post | 21st February, 2024: NGOCC in vawiin chawhnu dar 1 khan India Sawrkarin Free Movement Regime (FMR) a hlih leb Border fencing dah loh lantirna hun an hmang
He hunah hian resolution pahnih an pass:
- Vawiin (21.2.24) a NGOCC huaihawta mipui pungkhawm chuan India Sawrkarin Free Movement Regime (FMR) a hlip leh Indo-Myanmar ramri hung a tum hì tha kan ti lova, kan dodal tak zet a ni.
- Free Movement Regime (FMR) tih thar leh a nih theihna tur leh Indo- Myanmar ramri hung (Border Fencing) tih tum hi thulh a nih theih nana NGOCC hmalakna hi kan thlawp tlat a ni.
Non-Government Organisation Co-ordination Committee (NGOCC) huaihawt in Central Sawrkar in Myanmar leh India ram mite Passport leh Visa tellova an in kal pawh theihna Dan 'Free Movement Regime' a thiah tak leh India leh Myanmar ramri hung a tumna duhlohna punkhawm Vanapa Hall kawtah buatsaih a ni.
He punkhawmna hi Pu H. Lalthianghlima, President MZP in a kaihruai a, Prof. Malsawmliana, Secretary NGOCC leh Central YMA General Secretary ni bawk in NGOCC hmalakna Report a pe a, Pu Lalhmachhuana, Chairman NGOCC leh President CYMA nibawk chuan thu a sawi. Pi Ngurmawii Sailo, President MHIP chuan lawmthu sawina hun hmangin hun tawp a khar.
He punkhawmna huna thusawitu Pu Lalhmachhuana, Chairman NGOCC chuan, "Zofate hi ram hrang hrangah thendarh kan ni a, kan unaute nena zalen taka inkalpawh theihna dan kan neih Free Movement Regime min thiahsak a, kan in kalpawh theihloh nana ramri min hung sak tumtu Central Sawrkar hi kan dem a, an thiltih tum hi kan dodal zel dawn a ni." ati.
Pu Chhuantea chuan, "Manipur CM Biren Singha'n Central Sawrkar hnenah ramri hung tura a nawr vanga he thil hi thleng ta niin kan hria a, mi pakhat duhdan ang ngawta kan kal hian kan lo chhuan ve em em thin he Democracy hi a awn ruai ruai a, a kalsual mek niin alang." a ti.
"He FMR thiah anih theihna atan Central Sawrkar chhuanlam ber chu - Drugs tawlhruk dan nan te, Arm Rebellion (Ralthuam keng helpawl) lo lut tur dan nan te, Smugling tih tawpnan tihte a ni a, heng an thil tih tawp tum hi ramchhung atanga thurualpuitu an neih chhung chuan tihtawp tak tak theih a ni dawnlo. Chuvangin ramri hung zawng nilova kawng danga hetiang ti tawp tura hmalak hi a fuh zawk a ni. Kan u leh nau te nen hian dai danna bang in min hung hrang mahse, kan thinlung an hung tel theih dawn loh avangin thil thalo zawk a thlen phah theih a hlauhawm zawk a ni." a ti bawk.
"Sawrkar laipuiin Act East Policy a kalpui mek laia FMR tihtawp a tum lehsi hi thil inkalh tak a ni. He FMR thiah leh ramri hung thu ah hian theih tawpa dodal turin Mizo mipui zawng zawngte kan tanrual tlat a, kan dodal ngai a ni" a ti a.
"Sawrkar laipuiin chhuanlam atana a hman heng ruihhlo tawlh ruk leh smugling te hi khawchhak lama kan unaute pawh hian lo titawp a, lo insum rih ve turin ka sawm in ka ngen che u a, Zofate insuihkhawmna atana he FMR thiah leh ramri hung tum hi chak taka kan do tlan zel theihnan kan hmun theuh ah kan tih tur ve ve te ti a, kan tan tlan zel hi a ngai a ni" a ti bawk.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
News