Mizo Zirlai Pâwl Branch: Tarpho ten an huam chhunga zirlai hlawhtlinna changte chawimawina hun hmang.

Hnahthial Post | 27th May, 2024: He hunah hian Mizo Zirlai Pawl Headquarters: Hnahthial President, Pu Jimmy Lalrosanga chuan khuallian niin a hmanpui. Khuallian Pu Jimmy-a chuan thusawiin, Zirna tha nei turin Chhungkua, zirtirtute, All NGO leh Zirlaite an pawimawh zia sawiin, Zirna tha a awm theih nan tanrual a pawimawh ziate a sawi a. HSLC pass tharte Hnahthiala zirna sang zawk rawn pan turin leh Hnahthialah Arts, Science leh Commerce zirna kan nei a, hengte hi rawn hmang tangkai a khawtlangin a chhawr tlak ni a, zir zel turin a chah a ni.

MZP Branch Tarpho President, Tv Rochampuia pawhin thusawiin, Tarpho khawtlangin zirlai ti tha chawimawina a nei thei chu lawmawm a tiin, zirna kawngah tan la thar zel turin zirlai nu leh pa leh Zirtirtute bakah Tarpho khawtlang hruaitute chu a sawm thar leh bawk a. Zirlaite zinga hlawhtlinna chang pha lo te chu, indawm kun mai loin, an hlawhchhamna chu insiam that nan a hmang turin leh beidawng lo a, theih tawp chhuah leh turin a fuih bawk a ni.

MZP Branch: Tarpho Secretary, Tv Lalkhawngaihsanga chuan, MZP Branch Tarpho-in vawiina zirlai ti tha chawimawina an neihah hian, Primary School leh Middle School zirlai atangin school session liam ta a, pakhatna atanga pathumna leh HSLC pass tharte bakah HSSLC pass tharte chawimawina thilpek an pe tih sawiin, YMA Branch Tarpho leh VC tangkawpin tanpuina an pe bakah MZP Branch Tarpho-in an pha ang tawka sum an thawh chhuah atanga chawimawina pe a nih thu a sawi bawk. Tv PC Lalhlimpuia, Secretary MZP Hqrs: Hnahthial-in MZP Hqrs hmalakna leh hmachhawp te tarlang bawkin, MZP Hqrs: Hnahthial chuan Hnahthial District huam chhunga Zirlai zingah Civil Service exam tum Sponsor tura ruahmanna an neih mek thu leh MYC Coaching Centre Hnahthial-a dah ve a nih theih nan MZP-in hma an lak mek thu a sawi bawk.

Tv Lalherliana, Vice President, MZP Branch Tarpho chuan hun kaihruaiin Rbt Lalchhanchhuaha, ECM, MZP Branch Tarpho chuan hunserh hmangin Pathian hnena hun hlanna a nei a; "Zirnaah hian zirtirtu te aiin nu leh pa an pawimawh zawk" tih thupuia hmangin Zirlai nu leh pa leh Khawtlang hruaitu te atangin Debate neih a ni. Primary School zirlai leh Middle School zirlai ten kallhawm te lam entirna hun an bawk a ni.