Hnahthial Post | 14th September, 2024: Hnahthial District Truck Owners' Association chuan thu chhuah siamin Hnahthial chhimlam Lungpuitui bula kawngpui (NH54) tlabal chu pawi an tih thu tarlangin, helai kawng tlabal siam that a nih theih nana sawrkar hmalakna te pawh fakawm an tih thu bakah hmalakna a kal zung zung theih loh lai pawhin Sawrkar dem zawng emaw sawrkar nawr zawng emaw pawhin hmalakna engmah an nei lo a, sawrkar ngai chang chung zelin an awm a ni.
29th South Tuipui AC MLA, Pu Jeje Lalpekhlua leh District Bawrhsap Pi Rita Lalnunmawii Pachuau ten theihtawp an chhuahna pawh hriain lawmawm an ti hle a. Kawngpui bal siam nan a chhaklam ram laih zauh a ngaih avângin ram neitute hnenah zangnadawmna tur kawng enkawltu Company te aṭangin cheng nuai 12 District Bawrhsap-in a sawichhuah sak thute leh kawng laih zauh tur hi metres 5 a ni tih an hriatin thlamuan thlak an ti a ni.
Kawng laih zauh a nih tawh hnuin, ni 9th September, 2024 (thawhṭanni) khan HDTOA hruaitute chuan District Bawrhsap hmuin thla thum (3) dawn he kawngah hian an tlan tawh loh thu te, lirthei a eizawngtu an mangan zia leh an motor te pawh loan hmanga nei an nih thute hrilhin he kawng hi siam zawh a lo nih tawh takah chuan Medium chin tal tlan phalsak turin an ngen a ni. Chutih laiin District Bawrhsap chuan helai kawng siam tura a buai zia leh kawng hi chhe leh mai thei a nih thute, a chhiat leh chuan buaipui a tum tawh loh thu bakah a awm chhung chuan he kawngah hian LMV aia lian tlan thei turin hawn a tum loh thu HDTOA hruaitute chu lo hrilhin, HDTOA hruaitute chuan hriatthiam har a tih thu leh an rilru a nat thu an thuchhuahah hian an tarlang a ni.
 |
| ByPass Road |
Ni 9th September, 2024 vek khan YMA Sub-Hqrs Hnahthial hnuaia Sub-committee, Vigilance Committee te nen an inkawmna DDK Aizawl -a Zoram thlirna tarlan danin, District Bawrhsap hian Hnahthial-a a awm chhung chuan he kawngah hian LMV aia lian tlan theih turin an hawng dawng lo tih thu hi tarlan a lo ni bawk a, HDTOA chuan mak an tiin an mangan hle a ni
 |
| ByPass Road |
HDTOA thu chhuahah chuan, District Bawrhsap-in a awm chhunga helai kawngah hian LMV aia lian tlan thei lo tura a sawi hi ngaihtuah nawn leh se an ti a. HDTOA chu he lai kawngah hian tlan ve ngei an duh a, load la chunga ByPass kawnga kal reng hi Oil senso a tam phah bakah kawng hi a chhiat em avângin lirthei tan harsatna hrang hrang a thlen thin a, zan hnih lai an riah changte pawh a awm thin a ni. Hengtiang a nih reng dawn chuan an thil phurh man a san hun awm thei a ni dawn a, mipuite tawrhna thlen thei thil a nih avangin ṭha lo an ti a ni. Ni 20th September, 2024 ral hma ngei a, dan pangngai anga NH-54 kawng a an tlan ve theih nan hma laksak turin District Bawrhsap chu an beisei a ni. Hma a laksak thei dawn lo a nih chuan HDTOA-in an thiam dan angin hma an lak dawn thu leh mipuite leh helai kawnga tlan lirthei neitute'n harsatna an lo tawk a nih pawn, an mi hriatthiamna an ngen lawk tiin an thuchhuahah an tarlang a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
