MYC buatsaihin One Day Workshop on Career Guidance & Counselling neih a ni

Hnahthial Post | 30th October, 2024: Vawiin khan Mizoram Youth Commission chuan MYC Coaching Center Auditorium, MINECO-ah One Day Workshop on Career Guidance & Counselling an buatsaih a. Competitive Exam-a tui mite leh Service a inziaktling tawh ten inkawmna hun hlawkthlak tak an hmang a ni.

He hunah hian Pu Malsawmzuala Ralte, MYC Chairman chuan lehkha zir chu mihringte mi puitling a min siamtu a ni tiin zirlai kalkhawmte chu an hmalam hun a an kawng thlan tur leh an kal dan tur chiang taka an hriat theih nan Workshop chu hlawkthlak taka hmang turin a ngen a. MYC Chairman hian hlawhtling tur chuan tumruh, taimak leh teirei peih a ngai tih a sawi bawk a ni.

Pu Malsawmzuala Ralte chuan zirlaite chu thil kalhmang pangaia lungawi mai lo tura chahin, hmasawn tura insiam rem a, inruahman thiam zel a pawimawh tih hre turin a ngen a. Hlawhtling tur chuan tum mumal tak neih a pawimawh tih hre reng tur leh an kawng zawh te chiang taka chhut ṭhin turin a ngen bawk a ni.

He hunah hian Pi Christina Lalmuanzuali, MCS; Pu Bryan Zorintluanga, MFS; Pu KC Lalhriatpuia, MSS; Pu Elijah LH Sanga, MCS; Pi Jessica Lallawmzuali, MPS; Pi Lalremruati, MF&AS leh Pu Lalchhuanawma Ralte, MIS te hnen aṭangin Mizoram State Service hrang hrang te hnathawh dan leh Competitive Examination atana inpuahchah dan te ngaihthlak a ni.