Hnahthial District chhunga ruihhlo do dan tur ngaihtuah ho a ni.

Hnahthial Post | 21st January, 2025: Vawiin chawhma dar 11:00 khan DC Meeting Hall, Hnahthialah District Bawrhsap, Pi Rita Lalnunmawii Pachuau kaihhruaiin ‘Hnahthial District Level Task Force on Ruihhlo Do Committee’ an thukhawm a. Hnahthial District chhunga ruihhlo do dan tur chungchang an ngaihtuah ho a ni.

Meeting kaihruaitu, District Bawrhsap, Pi Rita Lalnunmawii Pachuau chuan Hnahthial District-a Ruihhlo dona atana sawrkar atanga sum dawn hi tangkai zawka an hman dan tur ngaihtuah a tul a ni a ti a. Ruihhlo la ngai ve lote venhim a, a ti tawhte sim tir tura tan kan lak a ngai a ni tiin zirna inah leh naupang sunday school-ah te pawh inzirtir that a tul a ni a ti a. Member-te chu uluk taka ngaihtuahna seng turin a chah bawk a ni.

Meeting chuan Addl SP hova ramri hrula Ruihhlo dona kawnga hma latute senso atan pawisa thenkhat hlan ni se tiin a rel a. Hnahthial District chhunga khaw pali, fur laia tlawh theih loh, Mat ral khua tlawh a, awareness neihna atan sum awm sa hi hman nise tih leh hording siam nan hman ni se tih a ni bawk.

Meeting-ah hian Addl. DC; Principal, School of Agriculture Science; Principal, Govt. Hnahthial College; District Education Officer, Sub-Divisional Police Officer; Chief Medical officer; CDPO, ICDS project; Principal, Govt. Higher Secondary School; President, YMA, Sub- Headquarters; Asst. Secretary, Sub- Headquarters, YMA leh Vice -President, MZP Hqrs Hnahthial te an tel a ni.