MZP Hqrs Hnahthial-in Hnahthial khaw chhunga Zirna In Board Exam tura inbuatsaih mek tlawh chhunzawm

Hnahthial Post | 30th January, 2025: Mizo Zirlai Pawl Headquarters Hnahthial Executive Committee Meeting-in a rel bawhzui nan, MZP Hqrs Hnahthial chuan zanin (30th January) khan Hnahthial khaw chhunga Zirna In, Board Exam tura inbuatsaih mek te tlawhna leh Zirlai Exam hmachhawn turte fuihna hun an hmang a, zâninah Zirna In pahnih, Gov't Southern High School leh Hnahthial Higher Secondary School te an tlawh.

Gov't Southern High School-a hun hmannaah hian Tv C Rodingliana, Vice President MZP Hqrs Hnahthial chuan kaihhruaiin, Tv PC Lalhlimpuia, Secretary MZP Hqrs Hnahthial chuan zirlaite fuihna thuchah tawi sawiin, Gov't Southern High School-a Zirtirtu senior boral ta, Pu Peka'n, 'I Thei' tih thu hmanga a lo fuih ṭhin angin, Zirlaite chuan Distinction emaw First Division-a pass chu an thei ve a ni tih hre thar turin leh lehkha zir mawl tawp lo a, tum nei turtein leh Southern High School mai bakah Hnahthial khua inchhuan ni thei turin zirlaite chu a fuih a ni.

Hnahthial Higher Secondary School, Kannan Veng a hun hmannaah hian Pu Jimmy Lalrosanga, President MZP Hqrs Hnahthial chuan zirlaite fuihna thuchah tawi sawi ve thungin, Zirlai te'n Zirna leh a kaihhnawiha harsatna an tawh chuan, MZP-a zualko hreh lo turin leh, MZP chu zirlai tan a tlan chhiat loh thu bakah, Hnahthial Higher Secondary School Zirlaite'n theihna nasa tak an nei a ni tih, MZP Hqrs Hnahthial chuan a hria a, Zirlai ti ṭha lawmpuina hun hmanaah an tel ve ngei a beisei thu te a sawi a ni.

MZP Hqrs Hnahthial hian, ni 29th January 2025 zan khan School dang 3, Gov't High School, FD Higher Secondary School leh Moria Public School te an lo tlawh tawh a, zirlaite ei leh in tur an sem bawk a ni.