Hnahthial College ramah DIET Building sa turin ruahmanna kalpui mek a ni

Hnahthial Post | 12th March, 2025: Mizoram Legislative Assembly Session neih mekah nimin (11th March) khan Higher & Technical Education Minister, Dr Vanlalthlana chuan Gov't Hnahthial College ramah Hnahthial DIET Building sak turin ruahmanna kalpui mek a nih thu House a hrilh.

South Tuipui Bialtu MLA Pu Jeje Lalpekhlua zawhna - Hnahthial DIET Building sak theih a ni dawn tawh em? A sakna hmun tur tih fel a ni tawh em? DIET Hnahthial hi engtikah nge a taka hman theih a nih ang? Tih chu H&TE Minister Dr Vanlalthlana chuan chhangin Hnahthial DIET hi kum 2023 khan Khawzawl nen a sakna tur Tender chhuah a nih tawh thu leh DIET-ah hian vacancy 41.7% zet a awm avangin a dang siam leh tur hian kan tlin ang em? Tih sawiin, "an hlawh hi a chanve kan tun a ngai si a, DIET pakhatah Zirtirtu 25 leh an mahni puitu staff 24 siam a ngai a, an hlawh chanve tum a ngai bawk si, DIET 2-ah Zirtirtu 50 Group A thuau post han siam kha kan huphurh khawp mai," tiin amaherawhchu NGO te a hnenah kalin tih ni ngei rawh se an tih thu te, bialtu MLA pawhin tih theih dan a awm em? a tih thute leh Meeting an neih hi thu a sawi a, "tih dan ngaihtuah ila nimai a lawm kan ti a" tender te pawh an ti nung thar leh tih a sawi a ni.

Khawzawlah chuan DIET Building hi an sa ṭan tih sawiin H&TE Minister chuan Hnahthial-in sakna tura an lo kawh hmuh kha Denlung khua a mimal ram a nih thu leh Kacha Road a nih thu a sawi a, "Kan Officers-te an va kal a, hetah chuan sak chi ni lo tih an rawn report a, work order kan lo inpe tawh laklawh si a, agreement sign a ngai tawh si a, tunah hian Hnahthial College ram chhungah sak tum a ni a, file pawh a kal mek a ni," tiin Hnahthial College hian NEP 2020 hnuaiah Integrated B.Ed Course an kalpui a ngai tih a sawi a, "Keiniin Hnahthial DIET hi hma lo lakpui theilo/tan thut theilo pawh ni ila College hian nakinah Integrated B.Ed Course kalpui nan a la ṭangkaipui ang tiin hmathlir thui tak nen dah dun a ni," tiin tan theih hun tur erawh a sawi theih chiah loh thu leh a tahtawlin a remchan dan angin buaipui zel an tum tih a sawi a ni.