Hnahthial Post | 18th April, 2025: Gov't Middle School, Thiltlang-in Hindi Zirtirtu an neih loh avangin nimin (17 April) aṭang khan zirlai nu leh pate chuan an fate School kal tir loin lungawi lohna an lantir a, MZP Hqrs Hnahthial hruaitute chuan nimin vek khan he School hi tlawhin harsatna awm mekte chinfel dan ngaihtuahin thuneitu sangah thlen nghal bawk a ni.
MZP Hqrs Hnahthial thuchhuahin a tarlan danin Gov't Middle School Thiltlangah hian kum 2022 aṭangin Hindi Zirtirtu an awm tawh lova, School thuneitu lamah an harsatna hi thlen ṭhinin, March ni 31, 2025 khan Gospel Centenary School, Cherhlun (Lump-Sum Aid) a thawk lai Lalnunsangi chu Gov't Middle School, Thiltlangah hian thawk tura tih niin; Ni 7 April, 2025 khan Gov't Middle School, Thiltlangah leh DEO Hnahthialah Joining Report pe mahse, MLA pakhatin Gov't Middle School Thiltlang a thawk lo tur leh Cherhlun a la awm rih tura instruction a pek avangin Lalnunsangi hian Thiltlangah awm loin Cherhlunah hian a awm rih ta thung a ni.
Hemi chungchangah hian MZP Hqrs Hnahthial chuan Lunglei North Bialtu MLA Pu V Malsawmtluanga pawh be nghalin chanchin an hriattîr a, MZP Gen-Hqrs Aizawl kaltlangin School Education Minister hnênah ziaka thlen nghal bawkin, School Education Minister hian Hindi Zirtirtuin kar thar lama Gov't Middle School Thiltlang a zawm tur thu a sawi a ni.