Save Tuichang hruaitute'n Lui chhunga lung leh ṭiau la tawh lo turin hriattir

Hnahthial Post | 15th April, 2025: Tun hnaiah Tuichang Lui, Ngharawh chhuahah JCB hmanga tui chhung lung la an awm nia hriat chu, nimin khan Save Tuichang, Hnahthial hruaitute'n a hmunah an zuk enfiah.

Thu dawnnain a tarlan danin, tun hnaiah Tuichang Lui, Ngharawh chhuahah hian JCB hmanga tui chhung lung leh ṭiau ṭhahnem tak lak chhuah niin he thilah Pu Atea, Tarpho khua leh Hnahthial District Truck Owner Association te chuan inrem siamin Lui chhunga lung leh ṭiau te hi an la niin an sawi a. Mining Lease mumal nei loa, hetia lui chhunga lung leh ṭiau an la hi Save Tuichang Hnahthial hruaitute chuan an duh loin, tun hma deuh pawn ABCI Company nen Court-ah an lo inkhing tawh a ni. 

Save Tuichang Hnahthial hruaitute hian Pu Atea, Tarpho leh Hnahthial District Truck Owner Association te hi Tuichang lui suasam tawh lo turin leh lui chhunga lung leh ṭiau la tawh lo turin an hriat a, an lak chhuahsa te pawh la phal loin Ngharawh chhuah chu chhuahsan turin an ti a ni. 

Hetih lai hian, Pu Atea, Tarpho leh Hnahthial District Truck Owner Association te chuan, Thiltlang VC-in No Objection Certificate an pek thu an sawi a ni.

Save Tuichang Hnahthial hi kum 2020-a din niin, Hnahthial tui tlan, Tuichang lui chu ABCi Company lamin nasa taka an suasam duh loh vanga Zirlai Pawl hrang hrang intelkhawmin an din a ni a. ABCi Company nen a Court-a an inkhinnaah ABCi Company lam chu thiam loh chantir an lo ni tawh a ni.