"Sorkar hnathawkte an vau nasa lutuk a, a vuaklet chuan nawrhna nasa tak a hring mek" - Lalruatkima, Treasurer, MNF
Hnahthial Post | 19th April, 2025: Vawiin April ni 19, 2025 (Inrinni) chhun dar 12:00 hian Hnahthial District Mizo Hnam Run-ah, Village Council 2025 inthlana MNF Candidate tlingte lawmpuina leh chawimawina (Citation) hlanna hun Pu Lalruatkima MNF Treasurer chuan a hmanpui.
Hun hmanpuitu Pu Lalruatkima chuan, "ZPM Sorkarin kawngtin rengin sorkar hnathawkte an vau nasa a, chu chuan nawrhna a hring mek a ni. Inthlan dawn kuma nuar ṭhinte chuan tun aṭangin lungawi lohna an lantir a, hei ti thil mak a tling. Chu chuan ZPM sorkar chu sorkar hnathawk ten an rintâwk loh zia a lan tir a ni," a ti.
Pu Lalruatkima chuan, "A hun pangngai ang chuan October 2025 velah Village Council inthlan buatsaih tur a ni a. Nimahsela, a hun pangngaia inthlan an buatsaih ngam loh avangin chhuanlam tur zawng chawpin inthlan hun thla 6-in an sawn hma a. A hun takah chuan inthlang ila, ZPM hian VC-ah sorkarna tih tham an la lo ang," a ti.
MNF Treasurer chuan, Buhfai man a lêt thawka tih to te, Petrol leh Diesel man tih sân te, Sawhthing, Hmuhphiah, Hmarcha leh Aieng an lei mumal thei lo te chu VC inthlan hun an sawn hma chhan a nih thu a sawi a. Heti chunga Hnahthial District huam chhungah VC tam tak an la thei chu Pathian remruat a nih thu leh, chu chu kum 2028-a an sorkar lehna tura hmasialtu a nih a rin thu a sawi.
"MNF sorkar hnuaiah chuan mipui kan him a, kan hlim bawk a. Buhfai leh Gas kan hnianghnar a, Kawngpui pawh kan thuam ṭha. Ramri Issue-ah pawh MNF aia ti ṭha an awm lo. Manipur leh Myanmar raltlan te chungchangah pawh MNF sorkar chuan Home Ministry thu a hnial kalh a, a ṭul chuan kan dodal mai zel. Chu chuan kan ram, kan hnam, kan sakhaw humhimna tura Party ding awmchhun a nihzia min hriattir a. MNF chuan zohnahthlak te kan kuangkuah thei vek, mah se, hnam bil ang zawnga inlak hran erawh chu kan rem ti lo a ni," Pu Lalruatkima chuan a ti.
ZPM sorkar chu sorkar hnathawkte vau ching leh pawl dangte diriam ching an nih thu pawh sawiin, Pu Lalruatkima chuan, CSS hnuai thawkte nawrh pawh nu leh pa chan chang loin an vau nghal a. Universal Health Care pawh Private Hospital pakhat mahin inremna (MOU) an la sign pui duh duh lo. Sorkar hnathawk inzawmkhawm pawlin an dodal bawk. Heng inrem lohna awm te hi dawhkan khat kila sawi fel tum aiin ZPM sorkar chuan vauna leh tihelna nen, runluih chungin an chawk hnawk zawk a ni, a ti.
MNF sorkar pawisa hnutchhiah crore 110 chu thlai thar lei nan kan dah ṭha, an ti a. Tunah sawhthing lei nan Crore 36 vel chauh an hmang a. A la chuang Rs. 74 crore hi a rang lamin sawhthing lei nan hmang rawh se, tunah chuan an chawh sa a ro ṭan a, a ṭhen a chawr a. A hlawk loh hun nghah chhuah kher hi ZPM sorkar thil tih vanduaithlak tak a ni, a ti a.
Vawiin Hnahthial Mizo Hnam Run inkhawm hi Chairman Pu C. Biakropuia South Tuipui West Block Treasurer-in a kaihruai.
