Furpui lo thleng chho tur avanga chhiatna pumpelh a nih theih nan mipute hriat tur Hnahthial Addl. DC chuan hriattirna a chhuah

Hnahthial Post | 30th May, 2025: Furpui lo thleng chho tur avanga chhiatna tam zawk pumpelh a nih theih nan leh mipuiten tih tur leh tih loh tur an hriat theih nan Hnahthial Addl. DC Pu Zothanmawia Khiangte chuan a hnuai ami ang hian hriattirna a chhuah.

Furpui kan lo thleng chho leh tan ta a. India Meteorological Department, Ministry of Earth Sciences, Govt. of India in Special Bulletin dt.28.5.2025-a a chhuah angin ni 3.6.2025 thleng hian ruah thahnem tak sur thei tura ngaih a ni. Tunah hian Mizoram hmun hrang hrangah leimin a awm mek a ni.

Khaw cheng mekah hian mipui te tan chiaina tur a awm lova, amaherawhchu, chhiatna thleng palh thei a nih avangin leimin leh chhiatna dang laka kan him tlan theih nan a hnuaia tarlan te hi zawm theuh turin Hnahthial District mipui te kan inhriattir a ni.

Hnathawk emaw zin veivak a chhuak tur te reng rengin chhuah hmain khawchin thithlai hmasak thin tur a ni a. Kawng laka tangkhan palh a ei leh in tur ruahman lawk tur a ni.

Tuichhe paihna leh tuihawk luankawr te tihfai leh mumal tak a siam tur a ni a. Tuihawk luankawr hnawh hian leimin a thlen theih avangin tuihawk luankawrah bawlhhlawh paih loh tur a ni.

Leimin thlen mai theihna hmun leh leimin lo awm tawh thinna bul hnaiah te awm loh tur a ni.

Ruah tui tam lai hian lei a nem a, a min hma bik avangin tul bikah lo chuan ruahtui tam laiin in hmun te laih loh tur a ni a. Lei laih laklawh nei te pawhin hna thawh zawhah khuh hul zel tur a ni.

Mahni in bul hnaiah lei min mai hlauhawm a awm chuan Silpaulin a khuh hul tur a ni a. A rang thei ang berin Vilage Disaster Management Committee-ah hriattir tur a ni.

Tumahin lei min leh chhiatna dang hrang hrang chungchangah thu belhchian dowl lo thehdarh loh tur a ni a. Lo thehdarh an awm chuan Disaster Management Act, 2005 hnuaiah hrem theih an ni ang.

Tek tiak lain a theih hram chuan inchhungah awm tur a ni a. Electronics bungrua te hman loh tur a ni. Tin, pawn a awm laia tek a tlak chuan thir lam chi leh thingkung lian hnaih a awm loh tur a ni.

Leimin leh chhiatna dang thleng palh emaw, thleng mai thei a awm a nih chuan a rang thei ang berin District Administration / DEOC No.8798762758-ah hriattir tur a ni.

Electric ban tlu emaw, hrui chat emaw a awmin khawih loh tur a ni a thuneitute hriattir thuai tur a ni.