Hnahthial Post | 30th May, 2025: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan NDA Khadakwasla, Maharashtra-a NDA cadet training chhuak turte thlahna puala Khetarpal Parade Ground-a Passing Out Parade (POP) buatsaih chu Reviewing Officer niin a hmanpui.
Reviewing Officer nia he hun hmanpuitu Mizoram Larsap, General (Dr) Vijay Kumar Singh (Retd) chuan NDA Khadakwasla atanga course zir zote thinlung taka a lawmpui thu sawiin, hmeichhe cadet batch hmasa berte NDA atanga an pass chhuak chu academy tana ni chhinchhiah tlak tak, mitin huapzo hmasawnna leh hmeichhiate chawikan nana hmalakna ataka lantirna, kan ram chanchina mellung chhinchhiah tlak tak a ni, a ti a. Heng thalai hmeichhiate hi hmeichhiate chakna 'Naari Shakti' entirna an ni a, hmeichhiate hmasawnna mai piah lamah hmeichhe kaihhruai hmasawnna a tak ngeia lantirna a ni, a ti a. Tun atanga hun reiloteah an zinga mi hian an kalna service a mawhphurhna sang ber an thlen theih ngei a beisei thu a sawi a. Pass chhuak zawng zawngte an kalzelna turah duhsakna a hlan a ni.
He hun hi India ram military history leh NDA chanchina thil chhinchhiah tlak leh hriatreng tawh tur niin, hmeichhe cadet batch hmasa ber mi 17 te'n 148th Course - Spring Term 2025 training hi zo felin, cadet pass chhuak 336 zingah an tel a. Passing Out Parade (POP) ah hian course zo hlim cadet 336 te tiamin avaiin cadet 1,351 an tel a ni.
Passing Out Parade hi Adjutant Lt Col Praveen Kumar Tiwari chuan hnehsawh taka kaihruaiin Academy Cadet Captain Udayveer Singh Negi, ‘G’ Squadron chu Parade Commander a ni a. An performance a that em avangin Reviewing Officer chuan President’s Gold Medal chu Battalion Cadet Adjutant Prince Raj, President’s Silver Medal chu Academy Cadet Captain Udayveer Singh Negi leh President’s Bronze Medal chu Battalion Cadet Captain Tejas Bhatt-te hnenah a hlan a. Chiefs of Staff Banner ngaihhlut hlawh tak chu Golf Squadron hnenah a pumpuia an tih that em avangin a hlan a ni.
He hun pawimawh takah hian cadet-te chhungkua, sawm bik mi pawimawh tak takte, zirlaite, mipui leh Armed Forces personnel pension tawh leh thawk mekte an tel a ni.
Tags
News