Hnahthial Post | 23rd May, 2025: Zoram Energy Development Agency (ZEDA) hmalaknain Mizoram pum huapa District tina khaw pakhat theuh Solar Model Village atana thlan tur zingah Hnahthial District atangin Thingsai khua chu thlan a ni.
He hmalakna pawimawh tak, Thingsai khua Solar Model Village a siamna turah hian ZEDA chuan Cheng Vaibelchhe khat (Vbch. 1) a ruahman a. He sum hmang hian Thingsai khuaah khawtlang mamawh chi hrang hrang - solar street light te, mimal in chung solar (rooftop system) te, leh thil pawimawh dangte - kalpui tum a ni. Heng hian khawtlangin eng an hmuh that phah bakah, kawlphetha renchem kawngah nasa takin a puih beisei a ni.
He project kalpui dan tur ruahmanna leh a tul dangte enfiah turin May 22, 2025 khan ZEDA ațangin Pi Lalthangliani, Project Officer leh Pu Benjamin Vanlallawmkima, Junior Engineer (JE) te chuan Thingsai khua hi an tlawh a, an enfiah nghal a ni.
He hmalakna hi Thingsai khawtlang tana tangkai tak leh hmasawnna rahbi pawimawh a nih rin a ni a. Thingsai khua Solar Model Village atana thlan a nih theih nana hmalak puitu State Sorkar leh an bialtu MLA chungah khawtlang aiawhin Village Council chuan lawmthu an sawi bawk. ZEDA hian Mizoramah Renewable Energy tihhmasawn kawngah theihtawp chhuahin hma a la mek zel a, clean energy chu mipuite'n tangkai zawka an hman theihnan ruahmanna hrang hrang a siam mek zel a ni.
Tags
News