Hnahthial Post | 5th June, 2025: Vawiin khan Mizo Zirlai Pawl Headquarters Hnahthial buatsaih, Hnahthial District chhunga HSLC leh HSSLC ti thate lawmpuina, Horeb Lodge Conference Hall-a buatsaih chu MLA, Pu Jeje Lalpekhlua chuan khuallian niin a hmanpui a. Hnahthial District chhunga zirlai ti tha, Distinction a pass, zirlai sawm pali (14) te hnenah lawmpuina thilpek hlan niin zirlai pass kim nei, sikul pasarih (7) hnenah lawmpuina hlan an ni bawk.
MLA, Pu Jeje Lalpekhlua chuan zirlaite chu he programme atana khual zahawm an nih thu sawiin chawimawitlak zirlaite chu a lawmpuiin fakawm a tih thu a sawi a. Chutihrual chuan hringnunah beidawnna leh harsatna an la tawh dawn chauh thu sawiin chumi tur atan chuan rilru lamah lo inruahman lawk turin zirlaite chu a chah a. Thawhrimna tello chuan hlawhtlinna a awm theih loh thu sawiin "Hlawhtlinna dik tak chu mahni tan chauh ni lo, thenawm khawvengte tana hlawhtling nih hi a ni" tiin zirlaite hnenah midangte tana luang chhuak turin a fuih a. Zirlaite chu hlawhtlinna chang theuh tura a duh thu sawiin chumi dal theitu, ruihhlo leh zuk leh hmuam laka inthiar fihlim hram hram turin a ngen a ni.
Hnahthial hi lehkhathiam khua an nih thin thu sawiin chumi ni leh thei tur chuan tan la theuh turin zirlaite chu a fuih a. Khaw te leh lian en hrang lovin Hnahthial District tan zirna in tha leh quarter tha te an siam dawn thu a sawi bawk a ni.
Zirlai tithate lawmpuinaah hian Pu Chhinkhanmanga Thomte, General Secretary, MZP Gen. Hqrs, Aizawl chuan Uaptu niin thusawina hun a hmang a. Pu PC Lalhlimpuia, Secretary MZP Hqrs Hnahthial chuan Report pein, Pu Jimmy Lalrosanga, President, MZP Hqrs Hnahthial chuan inlawmna thu a sawi a, Pu Lawrence Lalhlanthara, SDC chuan zirlaite fuihna thuchah neiin hun a hmang bawk. Pu C Rodingliana, Vice-President MZP Hqrs Hnahthial chuan kal khawmte hnenah lawmthu sawina hun a hmang bawk.
Malsawmsangi d/o Lalhriatpuia Pachuau, Electric Veng, Hnahthial hnenah Mizoram pumpui Commerce Stream-a pakuana (9th rank) a nih avangin lawmpuina hlan a ni a. Zirlai boral ta, FC Johan Laldinpuia s/o Dingngheta, Electric North, Hnahthial hnenah ngaihhruina thlipek hlan a ni bawk.
Tags
News