Hnahthial Post | 5th June, 2025: Tukin zing dar 6:30 khan Environment, Forest & Climate Change (EF&CC) Department, UD&PA, KVK leh PHE Department buatsaihin Nauhruaikawn-ah World Environment Day 2025 hman a ni a, he hun hi Pi K. Vanlalruati, District Bawrhsap chuan khuallian niin a hmanpui a, Nauhruaikawn atang Bazar thlengin Plastic bawlhhlawh char fai nghal a ni.
World Environment Day 2025 hmanna hun hi Pu C. Lalramdinsanga, Chairman Environment Sub Committee Sub Headquarters YMA Hnahthial chuan a kaihruai a, thu sawiin khuallian Pi K. Vanlalruati, District Bawrhsap chuan World Environment Day hi United Nations Environment Programe kaihhruaina hnuaiah kum 1973 atang khan June ni 5-ah neih thin a ni a, khawvel pumah boruak humhalh tura inzirtirna leh action lakna tur atana infuih tharna ni atan hman a ni thin a, kan chenna leilung enkawl hi kan mawhphurhna a ni a, environment hian boruak thianghlim min pek bakah tui intur leh eitur te min pe bawk a, hei vang hian kan humhalh a pawimawh em em a ni tiin kumin World Environment Day thupui “Ending Plastic Pollution Globally” hi hre rengin plastic leh sarang atanga siam bawlhhlawh sawngbawl kawngah kan fimkhur thar a tul tak zet zet a ni ti bawk.
He hunah hian Pu K. Lalkima, Executive Engineer, PHED Hnahthial WATSAN Division, Dr. Henry Saplalrinliana, Senior Scientist and Head KVK leh Pu H. Hmingthanzuala, President Sub Headquarters YMA Hnahthial te pawhin thu an sawi a, Pu Lalsangzuala, Range Officer, EF&CC Department chuan lawmthu sawiin a tin a, hemi hnu hian Bazar thlengin Plastic bawlhhlawh chharfai hnatlang thawh nghal a ni.
Tags
News