Hnahthial Post | June 15, 2025, Hnahthial: Mizoram Universal Health Care Scheme hnuaiah Hnahthial District-a damlo pawisa tel lova inenkawlna senso - cheng 1,72, 230 sawrkarin a pek sak tawh.
Mizoram Sawrkarin Universal Health Care Scheme (MUHCS) a kalpui mek ah, Hnahthial District chhungah mi 76 in MUHCS-ah bill an thehlut tawh a. MUHCS-a inziahluh hun hi tun thla thleng hawn a la ni dawn a ni.
Mizoram Universal Health Care Scheme (MUHCS) hnuaia pawisa tel lova damdawi ina inenkawl Hnahthial District-ah April thla khan mi sawm hnih pahnih (22) an awm a, May thlaah sawmthum pariat (38) leh June thla kal mekah sawm paruk (16) an awm a ni. Mizoram Universal Health Care Scheme (MUHCS)-ah hian sorkar laipui scheme kal mek Pradhan Mantri Jan Arogya Yojana (PM-JAY) leh Rashtriya Swasthya Bima Yojana (RSBY)-a Golden Card nei lo te inziah luh theih vek a ni a, anni bakah sorkar hnathawk chhungkaw zinga Medical Reimbursment (MR) bill kep ve theih lo te, pensioner te pawh inziahluh theih a ni. Hetiang chhungkua hi tun dinhmun-ah Hnahthial District chhungah chhungkaw sawm sarih pahnih (72) an inziak lut tawh a, RSBY-a inziaklut a golden card nei zat chiah erawh hriat theih a ni lo a ni.
Mizoram Universal Health Care Scheme (MUHCS) hi Mizoram chhunga sawrkar damdawi in zawng zawngah hman theih anih bakah chanchin buatsaih lai hian private damdawi in pakua (9) Serkawn damdawi in, MED AIM Champhai, Lairam Christian Medical Centre (LCMC) Lawngtlai, Christian Hospital Lawngtlai, Maraland Gospel Centenary (MGC) Siaha, Vohbik Care, Raphaa Day Care, 360 Hospitality leh Nazareth, Aizawl-ah te hman theih a ni a. Hei bakah hian Mizoram pawna damdawi in 28-ah te hman theih a ni tawh bawk.
Source: DD News Mizoram
Tags
News