SAMETI buatsaih Training Programe on Human Resource Development Hnahthial-ah neih a ni

Hnahthial Post | June 26, 2025, Hnahthial: Vawiin chawhma dar 11:00 khan DC Conference Hall, Hnahthialah State Agricultural Management and Extension Training Institute (SAMETI) chuan Agriculture leh a kaihhnawih Department leh NGO-te pualin Training Programe on Human Resource Development under RKVY Mizoram an buatsaih a, Hnahthial District Bawrhsap Pi K. Vanlalruati chuan khuallian niin training hi a hawng a ni.

Training hawnna hun hi Pi Julie Zodinpuii, District Agriculture Officer, Hnahthial in a kaihruai a. Khuallian Pi K. Vanlalruati chuan State Agricultural Management and Extension Training Institute (SAMETI) in Hnahthial District-a Agriculture leh a kaihhnawhte puala training an buatsaih thei chu lawmawm a tih thu a sawiin Human Resource Development chungchang hi a pawimawh hle a ni a ti a. Keimahni a thiamna leh theihna kan neih tihchangtlun a, tihhmasawn hi a tul thu sawiin keimahni mai chuan kan tihmasawn thei lo thin a, midangte hnen atanga thiamna tha zawk, sang zawk leh kaihhruaina tha kan dawn a tul thin a ni a ti bawk. Chumi avang chuan training te leh workshop-te neih hi kan mamawh thin a ni tiin hlawk taka training hmang turin kalkhawmte chahin training a hawng a ni.

Training-ah hian Pi Lalnunpuii Parte, Director, SAMETI chuan “Convergence with other institutions and Extension Methods” chungchang a zirtir a. Pi Lalthasangi, Faculty (HRD), SAMETI chuan “Quality of an Excellent Employee & Interpersonal Communication Skills” chungchang zirtirin “Mobile applications in Agriculture” chungchang Pu Vala T. Thanhnuna Tonson, Faculty (IT) SAMETI chuan a zirtir a ni. Training-ah hian Agriculture Department bakah Horticulture, AH & Vety, Sericulture, Environement Forest & Climate Change Dept., Land Resource Soil and Water Conservation Dept.; MzSRLM, Agriculture kaihhnawih Society leh NGO te an tel a ni.