Khawvel puma Ruihhlo hman Khawloh leh Tawlh ruk Dona Ni pualin Hnahthial District Excise & Narcotics Office chuan sikul naupang ho nen kawng an zawh

Hnahthial Post | June 26, 2025, Hnahthial: Tukin zing khan "International Day Against Drug Abuse and Illicit Trafficking, 2025" pualin Hnahthial District Excise & Narcotics Department ((END) te chuan kawng zawh an huaihawt a. Govt. High School leh Higher Secondary School zirlai naupangte nen an sikul kawt atanga Bazar Venga Field thleng kawng zawhin Inspector C. Lianchungnunga chuan zirlai naupangte chu ruihhlo hman sual dona kawngah theih tawp chhuah turin thutiam a laktir a ni.

Hnathial END O/C, Inspector C. Lianchungnunga chuan "Khawvel puma Ruihhlo hman Khawloh leh Tawlh ruk Dona Ni" rawn pian chhuah dan leh hman a nih chhan te sawfiahin tun kum atana thupui (Theme) chu - "Ruihhlo Vanga Dan Pawikhawihna Nuai bo" ( Break the Cycle, Stop Organized Crime) a nih thu a tarlang a. Mizoram chu Ruihhlo tawlh rukna kawng a nih avangin Mizo mipui, a bikin thlalai tam tak ruihhlo bawiha tang an awm thu a sawi a. Ruihhlo do tur chuan a in tanna, a chawk luhna atanga kan dan a tul thu sawiin chumi ti tur chuan khawtlang, sawrkar, kohhran leh mimal tinte kan pawimawh thu leh inlungrual taka ruihhlo kan do tlan a pawimawh takzet thu a sawi bawk. Ruihhlo tawlh ruk vangin ruihhlo ti an tam phah a, chumi maiah tawp lovin ruihhlo tih avangin pawikhawihna tam tak, rukruk leh mihring tawlh rukna thleng a thlen thin a, chumi a nih avang chuan ruihhlo vanga pawikhawihna nuai bo chu an thil tum ber an nih thu a tarlang.

Mizoram Excise & Narcotics Department-in Mizoram mipute hriat atana an duh te tarlangin Ruihhlo zuarte leh ruihhlo ti thinte hi Dan kalha khawsa, na taka hrem theih an nih thu a sawi a. Ruihhlo tawlh rutu emaw a zuartute emaw lo tanpuitu chu dan anga hrem theih an nih thu sawiin Ruihhlo lam hawia bawhchhiatna a awmin a hretu leh a hmutu chuan a rang thei ang berin Dan kengkawhtu, Excise & Narcotics-ah emaw Police-ah emaw hriattir vat turin mitinte chu a ngen nghal a ni.