Social Welfare Minister leh Excise & Narcotics Minister-te'n International Day against Drug Abuse and illicit Trafficking hmanpui

Hnahthial Post | June 26, 2025, Aizawl: Vawiin khan Pi Lalrinpuii, Minister, Social Welfare, Women and Child Development chuan ‘International Day Against Drug Abuse & Illicit Trafficking 2025’ chu Synod Revival Camping Centre, Neihbawi ah khuallian niin a hmanpui a. He hunah hian Pu Lalnghinglova Hmar, Minister, Excise and Narcotics Department chu khualzahawm a ni.

Khuallian Pi Lalrinpuii chuan ruihhlo tur nat zia leh ruihhlo avanga mipa an kiam chak chu veiawm a tih thu sawiin, ruihhlo ngaih chu natna tihdam theih anih avangin Hulhliap Short Stay Centre-a mithiamte enkawlna hnuaia ruihhlo ngaite awmna tur siam a ni chu lawmawm a tih thu a sawi a. Ruihhlo ngai Centre-a awmte chu insiamthat nana hmang tura chahin, ruihhlo bawih atanga zalenna famkim an chan ngei theih nan duhsakna a hlan a. Tihdam aia invenna a that zawk thu sawiin, kalkhawmte chu ruihhlo thatlohzia tlangaupui turin leh invenna lama nasa zawka tan la turin a chah a. Khuallian chuan ruihhlo ngawlvei damna chang tawhte tawnhriat tarlanna video tawi a tlangzarh bawk a ni.

Khualzahawm Pu Lalnghinglova Hmar chuan sawrkar, kohhran leh tlawmngai pawlte tanhona zara Hulhliap Short Stay Centre siam a ni chu lawmawm a tih thu sawiin, Covid-19 hripuiin min chimbuai vanglai, sawrkar pawh a chet hleih theih tawh loh hnua kohhrante hmalakna ropui tak kan hmuh ang kha, ruihhlo do kawngah pawh hmuh leh theih nise a duh thu a sawi a. Centre chu insiamthat nana hmang tura fuihin, ruihhlo la ti ngai lote pawh tih chhin tum lo turin a chah a. Ruihhlo dona reels insiamsiak lawmman a sem chhuak nghal a ni.

Thusawitu dang Pu Lalmuanpuia Punte, MLA, Adviser to CM (Political) chuan ruihhlo ngai enkawlna dawng mekte chu beidawng mai lova ruihhlo laka tal chhuaka that chhuah tum ngei turin a chah a, duhsakna a hlan nghal bawk.

Vawiin hun hi Pi Lalzarmawii, Commissioner & Secretary, Social Welfare, Women & Child Development chuan a kaihruai a. MYC Chairman Pu Malsawmzuala Ralte, Hulhliap Core Committee Chairman ni bawk hnen atangin Hulhliap Short Stay Centre siam tura Committee hmalak dan report ngaihthlak a ni a. Kalkhawmte’n ruihhlo laka filhim tur leh ruihhlo do kawnga an theihna zawn theuha hma la turin thutiam an la a ni.

Synod Revival Camping Centre ah hian ruihhlo ngaite enkawlna tur ‘Hulhliap Short Stay Centre’ chu June ni 23 atang khan kalpui tan a ni a, ruihhlo ngaiten an ruih hlo tih thinte lak atanga an inthuahfaina (detoxification) leh an taksa leh hriselna tih thatna (basic health care) tur hmun niin, ni 15 chhung a thlawnin, Doctor, Nurse leh Counsellor te enkawlna hnuaiah an awm hnuah, ni 5 chhung Gospel Camping-ah an lut nghal dawn a ni. Centre-a enkawl hun chhûng a zawh hunah chhûngte hnena haw leh theihna tur leh Rehabilitation Centre a referral te pawh ngaihtuahpui an ni ang.

He ‘International Day Against Drug Abuse & Illicit Trafficking’ ni hi kum 1987 December thlaa UN General Assembly-in Resolution a pass anga khawvel puma hman zui tak a ni a. Kumin thupui hi ‘Breaking the chains: Prevention, Treatment and Recovery for all’ tih a ni.