Lungleiah Drugs Disposal Committee-in District Police te man ruihhlo (heroin no. 4) ₹ 8,78,850/- man hu an hal ral

Hnahthial Post | June 26, 2025, Lunglei: International Day Against Drug Abuse & Illicit Trafficking pualin tukin khan Lunglei Police te'n ruihhlo an man, heroin no. 4 gram 316.58, ₹ 8,78,850/- man hu chu Lunglei District Superintendent of Police & Drugs Disposal Committee Chairman Pu J. Lalmuankima kaihhruaiin Lunglei AP Tlanga thil hal ralna thuk (incinerator) bun tharah hal ral a ni.

Ruihhlo hal ralnaah hian District Drugs Disposal Committee member - Sub-Divisional Officer (Sadar) Pi TT Beikhaizi leh Excise & Narcotics Assistant Commissioner Pu B. Ngurchhuana te bakah, DIPRO, DSWO, Sub-Headquarters YMA hruaitute, VDP Lunglei Town Co-ordination Committee hruaitute, police mi leh sate, NCC cadet leh mimal ṭhahnem ngai eng emaw zat an tel a ni.

Vawiina hal ral tak damdawi heroin no. 4 te hi ND & PS Act hnuaia case ziah luh-

(1) Lunglei PS Case No.63/2025 Dt. 20.04.2025 u/s 21(b)/25 ND&PS Act;

(2) Lunglei PS Case No.65/2025 Dt.21.04.2025 u/s 21(b)/29 ND&PS Act r/w sec 3(3) of the Passport (Entry into India) Act 1920;

(3) Lunglei PS Case No.79/2025 Dt. 20.05.2025 u/s 21(b) ND&PS Act te kaihhnawiha man a ni a. Judicial Magistrate First Class, Lungleiin phalna a pek angin he'ng ruihhlote hi hal ral a ni.

Lunglei District Police chuan nikum 2024 chhung khan heroin kg 1.930 (₹ 57,94,750/- man hu) leh ganja kg 13.016 (₹ 65,000/- man hu) an man a. Heroin kaihhnawihah thubuai 23 ziak lutin, mi 33 an man a; ganja kaihhnawihah thubuai 1 ziak lutin, mi 4 an man bawk a. Kumin 2025 June thla thlengin heroin gram 960.24 (₹ 28,89,180/- man hu) leh khuh damdawi (cough syrup) kg 13.100 (₹ 19,650/- man hu) man tawhin, a kaihhnawihah thubuai 8 ziak lutin, mi 12 an man tawh bawk a. Kumin 2025 chhungin zirlai, MHIP leh Myanmar raltlan mi 2,226 zingah ruihhlo ṭhat lohzia inzirtirna ṭum 17 an buatsaih tawh a. Kuminah heroin no. 4 ṭum 4 hal ral tawh niin, hal ral zawng zawng hi gram 758.29-a rit a ni.

Lunglei District Excise & Narcotics Department chuan nikum 2024 chhung khan heroin kg 3.165 (₹ 96,46,920/- man hu), alprazolam mum 2,011 (₹ 30,085/- man hu), ganja kg 6.41 (₹ 51,280/- man hu) leh khuh damdawi bur 2,426 (₹ 2,41,920/- man hu) an man a. He'ng kaihhnawihah hian thubuai 87 ziak lutin, mi 87 an man a. Kumin 2025 June thla thlengin heroin gram 254.97 (₹ 7,77,149/- man hu), alprazolam mum 9,072 (₹ 1,35,717/- man hu), ganja kg 47.36 (₹ 3,78,880/- man hu), khuh damdawi bur 372 (₹ 1,00,440/- man hu) leh methamphetamine mum 36,400 (₹ 600,600/- man hu) man tawhin, a kaihhnawihah thubuai 27 ziak lutin, mi 32 an man tawh bawk.