Social Welfare, Women & Child Development Minister Pi Lalrinpuii’n MHIP te tana Ruihhlo chungchang inzirtirna leh a thlawnna inentirna hun hmanpui

Hnahthial Post | 10th June, 2025: Social Welfare, Women & Child Development enkawltu Minister Pi Lalrinpuii’n vawiin khan YMA Hall Thuampui ah MHIP General Headquarters leh Aizawl District Nasha Mukt Bharat Abhiyaan (Drug Free India Campaign) tangkawp ten MHIP Thuampui Branch member te tana Ruihhlo chungchang inzirtirna leh a thlawnna inentirna an buatsaih chu a hmanpui a. Aizawl DC leh Chairman Nasha Mukt Bharat Abhiyaan Aizawl District ni bawk Er. Lalhriatpuia, IAS pawhin he hun hi a hmanpui a ni.

Minister Pi Lalrinpuii chuan Aizawl DC kaihhruaina hnuaiah Nasha Mukt Bharat Abhiyaan, Aizawl District in kawng hrang hranga ruihhlo dona atan hma an la mek zelna leh MHIP hruaitute pawh ruihhlo do leh a that lohzia inzirtirna kawnga theihtawp an chhuahna te chu lawmawm tiin ruihhlo dona atan keini nuho leh hmeichhiate hian mawhphurhna sang tak mai kan nei a ni, a ti.

Ruihhlo dona kawnga nu leh hmeichhiate pawimawhna an tawrh dan te sawiin chhungkuaa ruihhlo ti an awm hian a tuar nasa ber chu nute hi an ni tlangpui a, chuvangin, hma kan lakna kawngah pawh nute hnena zirtirna pek hi kan thlahthlam thei lo a. Ruihhlo ti mek kan buaipui lai hian ruihhlo la ti ve lote venhimna kawngah pawh zirtirna kan pek nasat a ngai hle a ni, a ti. Khawtlang leh kohhranah theihtawpin kan inhmang anih pawhin mahni chhungkua hlamchhiah lo ila, engkim bul intanna chu chhungkua anih tlat avangin Nute hian chhungkuaa mahni tih tur leh mawhphurhna te theihtawpa hlen chhuah tum theuh turin ka sawm duh che u, tiin nuho kalkhawm chu a chah a ni.

Minister chuan mitin mai hian ruihhlo kan do ta nia a hriat thusawiin, Sawrkar pawhin theihtawpa hma la chho zelin tunah hian ruihhlongai khawlaia tei rawlai hote enkawlna hmun tur ‘Hulhliap- Short Stay Centre’ chu din tumin chak takin hma a la mek a. Hetah hian sorkar department hrang hrangte leh tlawmngai pawlte pawh kan tel vek dawn a ni. Heti khawpa ramin kan buaipui anih avang hian keini pawh hian mahni theihna zawnah hma kan lo lak ve hi kan ram venhimna atan a tul tak zet tawh a ni tiin a sawi a ni.

Aizawl DC Er. Lalhriatpuia, IAS Nasha Mukt Bharat Abhiyaan, Aizawl District hnuaia Sub-Committee pakhat ‘Sub-committee on Drug Abuse Prevention Among Women’ chu MHIP hruaitute nen tanghoin hma an lak dan te a sawi a. He sub-committee kaltlangin nikum lam khan veng 7 ah mi 690 te hnenah ruihhlo chungchang zirtirna an pek thu a tarlang a. A sawi zel naah, chhungkuaa ruihhlo ti thin nei an awmin chhungkaw member naupang ber atanga a upa ber thlengin an tuar a, an chhiatpui thin a. Chumi anih avang chuan ruihhlo ti ngailo chhungkua pawhin ruihhlo thatlohzia (early prevention) in zirtir tam a pawimawh hle thu a sawi a. He inzirtirna atan hian chhungkua a nute hian mawhphurhna sang tak an nei a, an fate mizia leh ngainat zawng hre bertu an nih angin an fate nungchang zirchiang a, ruihhlo laka an lo fihlim zel theih nan theihtawp chhuah turin a chah a ni.

Ministry of Social Justice & Empowerment, Govt. of India leh AIIMS, New Delhi tangkawp chuan kum 2019 khan India ram puma ruihhlo hmansual dan zirchianna ‘Magnitude of substance use in India 2019’ a nei a, chuta a landan chuan Mizoram hi India ram pumah opiods kaihhnawih (heroin etc.) hmansual ah kan sang ber a ni. A lungchhiat thlak hle mai, kan inenlet a va hun tawh tak em.

National Survey an neihna atangin Sawrkar Laipui Ministry of Social Justice & Empowerment chuan ruihhlo hman sual hluarna bik district 272 chu thlang chhuakin ruihhlo chungchanga inzirtirna nasa lehzual zawk a hmalakna atan Nasha Mukt Bharat Abhiyaan (Drug free India Campaign) a kalpui mek a. Phase – I ah khan Mizoram district pathum thlan niin Aizawl, Champhai leh Kolasib ah te hma lak a ni. Phase – II ah hian district 100 tihbelh lehin tunah hian Nasha Mukt Bharat Abhiyaan hi District 372 ah kalpui mek a ni a, Mizoramah pawh district zawng zawng (11 te) a rawn huam ta a ni. District tinah hian Deputy Commissioner te hi he campaign ah hian Chairman an ni bawk a ni.

He hun hi Pi Ngurmawii, Vice President MHIP General Headquarters chuan kaihruaiin Mizoram Social Defence & Rehabilitation Board atang local mithiamten ruihhlo chungchang inzirtirna an pe a, Prof. Zokaitluangi, Asst. Secretary. MHIP Gen. Hqrs in lawmthu sawina a nei bawk a ni.

He hunah hian MHIP Thuampui member thahnem tak telin a thlawnaa inentir mi engemaw zat an awm bawk a ni.