Hnahthial Post | July 8, 2025, Hnahthial: Hnahthial District Aids Prevention and Control Committee chu vawiin khan Bawrhsap leh Chairman, Pi K.Vanlalruati kaihhruaiin DC Meeting Hall-ah an thukhawm a. Dr. Zodinpuii Hrahsel, Cluster Programme Manager, DISHA hnen atangin Mizoram pum leh Hnahthial District-a HIV natna kai awm zat dinhmun thlir hona neih niin nikum April thla atanga tun kum March thla thleng khan Hnahthial District-ah HIV natna hrik pai mi sawmpanga (15) hmuhchhuah an nih thu a tarlang.
Tarlan danin April 2024 -March 2025 chhung khan Mizoram pumah HIV hrik kai thar mi 2021 hmuhchhuah niin heng zinga 1330(66%) chu mipa an ni. Natna kai zingah hian Sex hman vanga kai chu tam berin kai zinga 68.13% (mi 1302) chu mipat hmeichhiatna hman atanga kai an ni a, inchiuna thianghlim lo hman avanga kai hi mi 559 (29.25%) an ni. HIV hrik kai zinga 88% chu kum 15 atanga kum 59 inkar an nih thu tarlan a ni bawk. Hetih rual hian tum kum nga liam ta chhung khan Mizoram pumah HIV natna vei thar an tlakhniam thu tarlan niin hei hi Hriau thianghlim inhmantirna - Needle Syringe exchange programme leh condom sem bakah awareness pek that avang te a nih thu tarlan a ni.
Hnahthial District-ah chuan kum 2024-2025 chhung khan HIV hrik pai hmuchhuah thar mi sawmpanga (15) an awm thu tarlan niin heng zinga mi 10 (66%) chu mipa an ni a, sex hman atanga kai hi mi pakua (9) niin inchiuna thianghlim lo hman avanga kai hi mi pali (4) an ni. Kum 35-49 inkar atangin HIV hrik pai hi hmuhchhuah hnem ber an ni.
Chief Medical Officer leh Member Secretary, Dr. R. Lalsanglura chuan Hnahthial District-ah HIV kai si lo, sex vanga natna chi hrang hrang, Sexually Tranmitted Infection (STI) vei an tam thu sawiin a bikin tleirawl ho zingah a hluar hle a ni a ti.
Bawrhsap chuan HIV hrik pai an tamna chhan pakhat chu ruihhlo vang a ni a a lan thu sawiin ruihhlo hman khawloh hian thil tha lo tam tak a thlen thu a sawi a. HIV do nan chang ni lo, sualna dang hrang hrang do let nan ruihhlo tawlh ruk hi kan dan a tul takzet thu sawiin Burma ram nena kan inri na hmunte chu vil uluk lehzual turin Police leh Excise te chu a chah a ni.
Zirlai naupangte'n HIV leh STI chungchang an lo hriat chian lehzual theih nana buatsaih - Red Ribbon Quiz Competition chungchang rel ho nghal a ni a. Competition hi Class 8,9 leh 11 te tan buatsaih niin school pakhat atangin zirlai pahnih theuh tel theih a ni dawn a. School level competition hi online google sheet a neih tur niin August ni 20-ah neih tura ruahmanna siam a ni. School level a ti tha thlan chhuahte hi District Level-ah inel lehin September ni 3-ah inelna hi neih tura ruahmanna siam a ni bawk.
District level a Pakhatna sikul hian Rs. 7000 an dawng ang a, pahnihna in Rs 5000 dawngin pathumna hian Rs. 4000 an dawng ang. Hei bakah participation price Rs.1000 a awm dawn bawk a ni. District level a pakhatna chu District aiawh in State Level Competition-ah an tel ang.
Tags
News