Justice Michael Zothankhuma’n Cherhlun leh North Vanlaiphaiah Legal Aid Clinic a hawng

Hnahthial Post | July 8, 2025: Vawiin khan Legal Services Authority Executive Chairman Hon’ble Mr. Justice Michael Zothankhuma, High Court Judge chuan Cherhlun leh North Vanlaiphaiah Legal Aid Clinic a hawng.

Hawnna thusawiin Justice Michael Zothankhuma chuan heng Legal Aid Clinic hi mipui mimirin dan leh hrai kaihhnawih thurawn an lak theihna tur leh, harsatna leh mamawhna an neih apianga an pan theih tura hawn a ni, tih a sawi a. Puih ngai mi tupawhin inthlahrung loa eng tik hunah pawh Legal Aid Clinic te hi pan thin tur leh khawtlang hruaituten tangkai taka hmang turin a chah a ni.

Justice Michael Zothankhuma chuan nimin khan khaw pathum - Thingsai, Bualpui H leh Thiltlang ah te Legal Aid Clinic te hi a lo hawng tawh bawk a. Heng Clinic te hi Para Legal Volunteer ten an vil dawn a ni.

Justice Michael Zothankhuma hian Cherhlun leh North Vanlaiphai khuate hman tangkai atan Silpauline thahnem tak Village Council te hnenah a hlan a. Mizoram State Legal Services Authority Member Secretary Pu Vincent Lalrokima leh Serchhip District Legal Service Secretary Josangzeli Tlau ten Judge hi an tawiawm a ni.