Hnahthial Post | July 25, 2025, Hnahthial: Govt. Hnahthial College chuan vawiin khan an college Auditorium-ah "Graduation Day cum Fresher's Social" chu hmangin MLA, Pu Jeje Lalpekhlua chuan Khuallian niin a hmanpui a. Session hmasa zawkah zirlai chhuak turte tana lawmman leh citation semna hun hman niin session hnihna ah hian zirlai lut tharte lawm luhna hun hman a ni. College Annual Magazine - 'Lawhleng' chu khuallian hian a release nghal bawk.
Khuallian chuan Govt. Hnahthial College-in za a za pass chhuak a nei leh Distinction hial an nei ta hi thil chhinchiahtlak leh lawmawm tak a nih thu a sawi a. Zirlaite leh zirtirtute chu fakawm a tih thu sawiin pass chhuak turte pawh an hlawhtlinna hi a bul tanna chauh a ni tih hre tura a duh thu a sawi a. Hlawhtlinna chan hian mahni tan mai ni lovin midangte tan pawh hlawhtling tel turin graduate turte leh lut tharte chu chahin thurawn la hreh lo turin a chah bawk. An chhuahna theihnghilh ngai lo tura chah nghalin thawhrimna nen theihtawp chhuah turin zirlaite chu a fuih nghal a ni. Ruihtheihthil laka fihlim tura a duh thu sawiin Hnahthial District siamtha tur chuan keini bak kan awm lo a ni tiin zirna dah hmasa zel chunga kawng engkimah hmasawn tura tan la zel turin zirlaite chu a chah a ni.
Pu Jeje-a chuan Hnahthial chu hmasawnna kawng engkimah a zuanin a zuang ni a a hriat thu a sawi a. Tun hnai maia North East puma SDG Index a pakhatna kan nih leh hmasawnna hrang hrang kan hmuhte hi mipuite, tun sawrkar leh sawrkar hmasate hmalakna zar a nih thu sawiin lawmawm a tih thu a sawi a. College ramah DIET sak a nih loh nan theihtawpa hma an lak thu sawiin college ram chu thil dang engmah luahlantir a phal loh thu a sawi nghal a ni.
He hunah hian Chief Minister's Bana Kaih Innovation Challenge hnuaia 'Higher Educational Institute Local Immersion Challenge' a tel zirlaite henah citation hlan niin an khaw thlan, Tuipui D tan an pawisa dawn, cheng nuai khat hmangin kuthnathawktute mamawh bungrua an lei tawh thu tarlan a ni bawk.
Lawmman hrang hrang sem nghal niin chungte chu :-
I) Best Library User Award:-
Teacher - Dr. C. Hmingsangzuala, Asst. Professor
Student - 1. F. Lalruatfela, 2nd Semester
2. Malsawmtluangi Hmar, 4th Semester
3. Freddy VL Ngheta, 6th semester
II) Academic Proficiency Awards, 2025:
1. Lalsiamthanga Award ( Departmental Academic Proficiency Awards in Economics)
- Remsangzuali Sailo ( cgpa 8.06)
2. Lalnuntluangi Award (Departmental Academic Proficiency Awards in Education)
- Lalsiammawii ( cgpa 7.50)
3. J. Lalchhanhimi Award (Departmental Academic Proficiency Awards in Mizo)
- Zodinpuii (cgpa 7.50)
III) Sangthanga Award (Valedictorian Award: Student with Highest cgpa)
- Remsangzuali Sailo (cgpa 8.09)
IV) K.Lalsangluaia Award (Student of the year)
- Lalsiammawii ( Department of Education)
Govt. Hnahthial College atanga graduate batch hi 100% pass-in Mizoram pumah pass tha ber an ni a, Distinction (cgpa>=8.00) a pass hi pakhat an nei bawk a ni. MZP chuan 100% pass an neih pualin college Principal hnenah citation an hlan bawk.
Tags
News