Hnahthial Post | July 26, 2025, Hnahthial: Agriculture and Farmers' Welfare Minister, Pu PC. Vanlalruata chuan nimin (25 July) khan Hnahthial District-a a Department chan hnuaia Office hrang hrang - District Agriculture Office, School of Agricultural Sciences (SAS) leh Krishi Vigyan Kendra (KVK) te tlawhin an dinhmun a enfiah a ni.
School of Agriculture Sciences (SAS) a hun a hmannaah Pu PC. Vanlalruata chuan zirlaite hmaah thu sawiin Aizawl Agriculture Directorate tih lohvah chuan Hnahthial chu Agriculture Department tana hmun pawimawh tak a nih thu a sawi a. Keini developing country ah hi chuan Agriculture hi kan innghahna a ni a, hemi avang hian Agriculture and allied kan tih mai, Agriculture te, Horticulture te, Vety te, Sericulture leh Soil thlengin state innghahna, livelihood a ni a ti a. Hemi kawnga tawn hriat leh training neih te hi a pawimawh em em a ni a ti bawk.
Minister chuan thiamna sang zawk leh hmanraw tha zawk hmanga lo neih hi a tul tawh thu sawiin SAS a zirlaite chuan thiamna leh finna tak tak zir chhuak se a duh thu a sawi a. Chu chu anmahni intodelhna atana an hman piah lamah kuthnathawktute hnenah hlan chawngin kan ramin kan thatpui dawn a ni a ti. Khawvel changkang chho zelah eizawnna kalphungte pawh a inthlak chho zel a, zirlaite chu enterpreneuship lamah te pawh an la kal duh tur thu sawiin kan sawrkar hian kuthnathawktute lam a hawi tlat a ni a ti a. Kan thlai thar chhuah sawngbawl a, hlawk zawka hralh a nih theih dan tur pawh a ngaihtuah reng thu sawiin kuthnathawktute leh an thlai thar hralhna hi thlunzawm kan tum a ni a ti bawk. Hemi atan hian an zirna chu a tangkai tur thu sawiin he school atang hian hmasawnna thar an zirchhuah ngei a beisei thu leh kan ram hma hun an ni tih hre reng tura chahin theihtawp chhuah a, zir a, hlawhtlinna chang turin duhsakna a hlan bawk a ni.
Minister hian District Agriculture Office a tlawh hmasa ber a, DAO thawktute chuan harsatna an leh mamawh an neih te Minister hnenah hian an thlen a, SAS tlawh lehin hemi hnu hian KVK-a tlawh bawk. KVK thawktute chuan an hmalak dan hrang hrang powerpoint presentation hmangin Minister hi an hrilhfiah bawk a ni.
Tags
News