Hnahthial Post | July 27, 2025, Aizawl: Mizoram chak lakna kawngpui thawm that hna chak zawka thawh a nih theihnan ZPM Legislature Party thukhawm chuan nitin Minister leh MLA pahnih talin hnathawhna hmun tlawh ziah an rel.
ZPM Minister leh MLA 16 te chuan nizan khan PWD Minister Pu Vanlalhlana kaihhruaiin kawng chungchangah inhmuhkhawm hmanhmawh an nei a, lirthei tangkhangte a rang thei ang bera an chhuah theihnan ruahmanna siam chhunzawm zel relin, Home Minister-in a tih tur ṭulte lo ngaihtuahin Police lam pawh ṭhahnem zawk tirh luh an rel a, lirthei tangkhang enkawltute ei leh in tur buaipui nan cheng nuai 3 pek chhuah chu vawiin atanga sem tanin, Kolasib bialtu MLA Deputy Speaker Pu Lalfamkima chu vil zui turin an ruat a, Sairang lam hnaiha tangkhangte ei leh in tur pek chungchang chu Dr. Lorrain Lalpekliana Chinzah leh Pu Jeje Lalpekhlua-ten an enpui dawn bawk a ni.
Kawng siam ṭhatna atan lung mamawh chu Mizoram pumah a lakkhawm theih dan kawng dap an rel bawk a, kawng chhiatna hmunah hian, PWD thuneitu sang chinin awm chilh se an ti a, NHIDCL leh PWD-te hnathawh hi nitin Minister leh MLA pahnih talin tlawh ziah turin an rel bawk a, helai kawng hi Mizoram kawngpui pawimawh a nih avangin Chief Minister Pu Lalduhoma duh danin sorkar sum awm ang angin harsatna awm mek chinfel dan tur ngaihtuah chhunzawm zel a ni dawn tih an tarlang bawk a ni.
Tags
News