Hnahthial Post | July 18, 2025, Hnahthial: Nimin (17, july 2025) khan Hnahthial DC Conference Hall-ah Chief Minister's Special Package hnuaia Bana Kaih Progress Partners te tan an hriattur tulte inhrilhhriatna hun, District Orientation Training buatsaih a ni a. Bawrhsap, Pi K. Vanlalruati chuan thu sawiin Addl DC, Pu Zothanmawia Khiangte chuan he hun hi a kaihruai a, bank leh line department hrang hrang ten kalkhawmte hriattur tul hrilhhriatna atan hun an hmang a ni.
Bawrhsap chuan progress partners-te hmaah thu sawiin kalkhawmte chu sawrkar duhsakna a bika dawng tute an nih avangin a lawmpui thu a sawi a. Chutih rual chuan an dawn chhan ang ngei, mahni trade thlanah theuh thahnem ngai taka thawk tura chahin a hlawkna chhar chhuak ngei thei tura theihtawp chhuah turin a chah bawk. Bana Kaih scheme, 2024 chungchang inhrilhhriat tharna hun hmang nghalin September ni 19, 2024 khan Mizoram puma hman turin CM in a tlangzarh thu a tarlang a. Bana Kaih scheme hnuaiah hian cheng vbc 200 dah a nih thu sawiin a kalphung chiang zawka mipuiten a hriat theih nan YouTube, website leh social media hrang hrangah inzirtirna siam a nih thu a sawi a ni.
He CM Special package hnuaia sum fai (grant) dawng theite tarlangin - Mizo khua leh tui dik tak, kum 18 aia upa, Sawrkar hnathawk lo, sumdawnna ngelnghet neilo mai bakah an trade thlan ti hlawhtling tura thiamna neite an nih thu a tarlang a. "Project kan tih hi hma thar lakna tur atana ruahmanna tihna niin Progress partner kan tihte chu hmasawnna kawnga hmachhawp mumal tak nei, chumi ti hlawhtling tura hamthatna dawng tlaka sawrkarin a ngaih, a thlante an ni" tiin Progress Partners te chu he CM Package hnuaia tanpuina an dawn hi hlawhtlinpui theuh turin duhsakna a hlan a ni.
Thusawi zawh hian Line department hrang hrang - Agriculture, Horticulture, Sericulture, Soil & Water Conservation, Animal Husbandry & Veterinary, Fisheries leh Commerce & Industries bakah Bank lam aiawhte chuan an department hnuaia trade hrang hrang thlangte hriattur tul hrilhhriatna hun an hmang a ni.
CM Special Package grant hi Sawrkar Line Department hrang hrangte hnenah pek chhuah tur niin chuta tang chuan hamthatna dawngtu turte bank account-ah direct-in (Direct Benefit Transfer) thun a ni ang a. Line Department ten Progress Partners te hi an vil zui bawk ang.
Hnahthial District-a CM Special Package hnuaia Department hrang hrang ten Progress Partners an neih dan chu : Agriculture- 7; Horticulture - 12; Sericulture - 2; Soil & Water Conservation - 8, Animal Husbandry & Veterinary - 25; Fisheries - 13 leh Commerce & Industries - 23 te niin Progress Partners hi an vaiin 90 an awm a ni. A trade ang zawng chuan vawk vulh ( Piggery ) thlang tam berin mi 21 in a thlang a ni.
Tags
News